ஆபத்தான முறையில் பயணம் செய்த மக்கள்

திண்டுக்கல்: பேருந்துகளில் மேற்கூரையில் ஏறி ஆபத்தான முறையில் தங்கள் ஊருக்கு மக்கள் பயணம் செய்த சம்பவம் பார்ப்பவர்களை அச்சமடைய செய்துள்ளது.

தமிநாட்டில் கரோனா வைரஸ் தொற்று பரவாமல் இருப்பதற்காக மார்ச் 31ஆம் தேதிவரை தமிழ்நாடு அரசு நேற்று மாலை 6 மணி முதல் 144 தடை உத்தரவை பிறப்பித்துள்ளது . இதில் முக்கிய அம்சமாக மாவட்ட எல்லைகள் மூடப்படுவதால் போக்குவரத்து நிறுத்தம் செய்யப்படுகிறது. இதன் காரணமாக பொதுமக்கள் தங்கள் ஊர்களுக்கு செல்வதற்கு நேற்று காலை முதல் அதிக அளவில் திண்டுக்கல் பேருந்து நிலையத்திற்கு வந்த வண்ணம் இருந்து வருகின்றனர்.

இந்நிலையில், திண்டுக்கல்லில் திருச்சி, பழனி, மதுரை ஆகிய ஊர்களுக்கு மக்கள் செல்ல போதிய பேருந்துகள் ஏற்பாடு செய்யப்படவில்லை. இதனால் 300க்கும் மேற்பட்டோர் திடீரென பேருந்து நிலையத்திற்கு முன்பாக சாலை மறியலில் ஈடுபட்டனர் . தகவலறிந்த காவல் துறையினர் சம்பவ இடத்திற்கு விரைந்து வந்து பொதுமக்களிடம் சமரச பேச்சுவார்த்தை நடத்தி பொதுமக்கள் செல்வதற்கு பேருந்துகளை ஏற்பாடு செய்து அனைவரையும் பேருந்துகளில் அனுப்பி வைப்பதாக உறுதி அளித்தனர்.

அதன்பின்னர் அப்பகுதிகளில் வந்த பேருந்துகளில் மேற்கூரையில் ஏறி தங்கள் ஊருக்கு மக்கள் பயணம் செய்தனர். ஆபத்தான இந்த பயணத்தில் வேறு வழியின்றி செல்வதாக பலர் கூறினர். அதிலும் திண்டுக்கலில் இருந்து மதுரைக்கு சென்ற பேருந்தில் இளைஞர் ஒருவர் ஓடும் பேருந்தில் பின்பக்கமாக மேல் கூரையில் ஏறி பயணித்த சம்பவம் பார்ப்பவர்களை அச்சம் கொள்ளச் செய்தது.