திண்டுக்கல்:மதுரை மாவட்டத்தில் இருந்து திண்டுக்கல் மாவட்டம் பிரிக்கப்பட்டு கடந்த 1985ஆம் ஆண்டு செட்டி நாயக்கன்பட்டியில் மாவட்ட ஆட்சியர் அலுவலகம் கட்ட அப்போதைய தமிழ்நாடு அரசு முடிவு செய்தது. அதன்படி 55 விவசாயிகளிடமிருந்து 215 ஏக்கர் விவசாய நிலங்கள் கையகப்படுத்தப்பட்டன.
இந்நிலையில் செட்டிநாயக்கன்பட்டியைச் சேர்ந்த மனோன்மணி என்பவர், 10 ஏக்கர் விவசாய நிலத்தை வழங்கி உள்ளார். இதற்கு இழப்பீடாக ஏக்கருக்கு ரூ.5,500 வழங்க தமிழ்நாடு அரசு முடிவு செய்தது. இதனை ஏற்காத மனோன்மணி திண்டுக்கல் முதன்மை சார்பு நீதிமன்றத்தில் வழக்குத் தொடர்ந்தார்.
வழக்கை விசாரித்த நீதிபதி ஏக்கருக்கு இழப்பீடாக ரூ.1 லட்சமும், 30 சதவீதம் ஆறுதல் தொகையும், 15 சதவீதம் வட்டியும் வழங்க உத்தரவிட்டது. இதனை ஏற்காத விவசாயி மனோன்மணி சென்னை உயர் நீதிமன்றத்தில் கூடுதல் இழப்பீட்டுத்தொகை கேட்டு வழக்கு தொடர்ந்தார்.
வழக்கை விசாரித்த நீதிபதி கடந்த 2012ஆம் ஆண்டு ஏக்கருக்கு ரூ.2.5 லட்சமும், 30 சதவீதம் ஆறுதல் தொகையும், 15 சதவீதம் வட்டியும் வழங்க வேண்டும் என உத்தரவிட்டார். ஆனால், இதுவரை இழப்பீட்டுத் தொகை மனோன்மணிக்கு வழங்கப்படவில்லை எனத்தெரிகிறது. இதனால் பாதிக்கப்பட்ட விவசாயிகளின் உயர் நீதிமன்ற உத்தரவை அமல்படுத்த மறுக்கும் மாவட்ட நிர்வாகத்தின் மீது நடவடிக்கை எடுக்க வலியுறுத்தி திண்டுக்கல் முதன்மை சார்பு நீதிமன்றத்தில் மீண்டும் வழக்குத் தொடர்ந்தார்.