‘12ஆம் வகுப்பிற்கு பின் என்ன படிப்பது?’ - மாணவர்களுக்கான சிறப்பு நிகழ்ச்சி!

தருமபுரி: அரசுப் பள்ளியில் பயிலும் மாணவர்களுக்கான கல்வி ஆலோசனை நிகழ்ச்சியை அமைச்சர் அன்பழகன் தொடங்கிவைத்தார்.

தருமபுரியில் அரசுப் பள்ளியில் படிக்கும் மாணவ மாணவியருக்கான கல்வி வழிகாட்டி நிகழ்ச்சி தனியார் பள்ளிகளின் கூட்டமைப்பு சார்பில் நடைபெற்றது. ‘பன்னிரெண்டாம் வகுப்பிற்கு பின் அடுத்து என்ன?’ என்ற தலைப்பிலான இந்தக் கருத்தரங்கை தமிழ்நாடு உயர் கல்வித் துறை அமைச்சர் கே.பி. அன்பழகன் தொடங்கிவைத்தார்.

இந்தக் கல்வி விழிப்புணர்வு கருத்தரங்கில் 10 மற்றும் 12ஆம் வகுப்பு படிக்கும் பள்ளி மாணவ மாணவிகள் பயன்பெறும் வகையில் கல்வியாளர் ஜெயபிரகாஷ் காந்தி, வருமான வரித் துறை ஆணையர் நந்தகுமார் உள்ளிட்டோர் கலந்துகொண்டு எந்தெந்த துறைகளில் வேலைவாய்ப்புகள் உள்ளன என்பது குறித்து மாணவர்களுக்கு அறிவுறுத்தினர்.

மாணவர்களுக்கு வழங்கப்பட்ட கையேடு

நிறைவில் பேசிய அமைச்சர் கே.பி. அன்பழகன், அரசுப் பள்ளி மாணவர்களுக்கு 14 வகையான கல்வி உபகரணங்களை வழங்கிவருவதாகவும், கடந்த 2011ஆம் ஆண்டு முதல் 2019ஆம் ஆண்டுவரை எட்டு ஆண்டுகளில் தமிழ்நாட்டில் 82 புதிய அரசுக் கல்லூரிகள், ஆயிரத்து 666 புதிய பாடப்பிரிவுகள் தொடங்கப்பட்டுள்ளன என்றும் கூறினார்.

மேலும், இந்தியாவிலேயே உயர் கல்வியில் தமிழ்நாடு முன்னணி மாநிலமாக திகழ்வதாகவும் அமைச்சர் அன்பழகன் பெருமிதம் தெரிவித்தார். இந்த நிகழ்ச்சியில் சுமார் இரண்டாயிரத்திற்கும் மேற்பட்ட அரசுப் பள்ளி மாணவ மாணவியர் கலந்துகொண்டனர்.