காணொலி காட்சி மூலம் நடைபெற்ற மக்கள் குறைதீர்வு கூட்டம்!

கடலூர் மாவட்டத்தில் காணொலி காட்சி மூலம் பொதுமக்கள் குறைதீர் நாள் கூட்டம் நடைபெற்றது.

கடலூர் மாவட்ட ஆட்சித் தலைவர் அலுவலகத்தில் நேற்று (ஆக.10) காணொலி காட்சி மூலம் கரோனா வைரஸ் தடுப்பு நடவடிக்கைகளும், பொது மக்கள் குறைதீர் நாள் கூட்டம் நடைபெற்றது.

இக்கூட்டமானது மாவட்ட ஆட்சித்தலைவர் சந்திர சேகர் சாகமூரி முன்னிலையிலும், தொழில்துறை அமைச்சர் எம்.சி.சம்பத் தலைமையிலும் நடைபெற்றது.

இதுகுறித்து தொழில்துறை அமைச்சர் எம்.சி.சம்பத் கூறுகையில், "கடலூர் மாவட்டத்தில் கரோனா வைரஸ் தடுப்பு நடவடிக்கைகள் மேற்கொள்ளத் தமிழ்நாடு முதலமைச்சர் பல்வேறு நடவடிக்கைகளை மேற்கொண்டு வருகிறார்.

கிராம கண்காணிப்புக்குழு மூலம் பாதுகாக்கப்பட்ட பகுதிகளில் நோய் தொற்றுக்குள்ளானவர்களின் குடும்பங்களுக்கும், அவர்களை சார்ந்தவர்களுக்கும் அத்தியாவசிய தேவைகளான உணவு பொருள்கள் வழங்கப்படுகிறது.

சர்க்கரை நோய் கண்டறியும் முகாம்களும் நடத்தப்பட்டு வருகிறது. அவசர தேவைகள் மற்றும் உதவிகளுக்கு மாவட்ட ஆட்சித் தலைவர் அலுவலகத்தில் இயங்கிவரும் மருத்துவ கட்டுப்பாட்டு அறை எண்.1077 என்ற எண்ணிற்குத் தொடர்பு கொள்ளவும்.

பொதுமக்கள் முகக்கவசம் கட்டாயம் அணிய வேண்டும். அரசுக்கும், மாவட்ட நிர்வாகத்திற்கும் பொதுமக்கள் முழு ஒத்துழைப்பு அளித்திட வேண்டும்" என்றார்.

இக்கூட்டத்தில் 50 நபர்களுக்கு அனுமதி வழங்கப்பட்டு காணொலி காட்சி மூலம் குறைகளைக் கேட்டறிந்தனர்.

அப்போது, ஓய்வூதியம் வழங்க கோருதல், நில அளவை, சாலை வசதி ஏற்படுத்துதல் போன்ற பல்வேறு கோரிக்கைகள் பொதுமக்கள் முன் வைத்தனர் என்பது குறிப்பிடத்தக்கது.