17 பேர் மரணத்துக்கு காரணமாக துணிக்கடை அதிபர் மீது நடவடிக்கை எடுக்கக்கோரி ஆர்பாட்டம்!

கோவை: மேட்டுப்பாளையத்தில் சுற்று சுவர் இடிந்து விழுந்ததில் 17 பேர் பலியான சம்பவத்தில் உரிய நடவடிக்கை எடுக்கக் கோரி பொதுமக்கள் போராட்டத்தில் ஈடுபட்டுள்ளனர்.

தமிழ்நாடு முழுவதும் வடகிழக்கு பருவமழை தீவிரம் அடைந்துள்ளநிலையில், பல்வேறு மாவட்டங்களில் கனமழை பெய்துவருகிறது. இந்நிலையில் கோவை மாவட்டம் மேட்டுப்பாளையத்தில் நேற்றிரவு விடிய விடிய பலத்த மழை பெய்தது.

இந்த கனமழையில் மேட்டுப்பாளையம் ஏடி காலனி பகுதியிலுள்ள பிரபல தனியார் துணிக்கடை அதிபரின் வீட்டின் சுற்றுச்சுவரில் மண்அரிப்பு ஏற்பட்டது. 15 அடிக்கு மேல் உயர்த்தி கட்டப்பட்டிருந்த சுற்றுச்சுவர் இன்று அதிகாலை, திடீரென அப்பகுதியிலுள்ள குடியிருப்புகள் மீது விழுந்தது. இதில் வீட்டில் தூங்கிக் கொண்டிருந்த குழந்தைகள் உள்பட 17 பேர் உயிரிழந்தனர்.

இதனையடுத்து சம்பவ இடத்துக்கு விரைந்துவந்த மேட்டுப்பாளையம் தீயணைப்புத்துறையினர் சுமார் 2 மணி நேர போராட்டத்திற்கு பின் 17 பேரின் உடல்களை மீட்டனர். தொடர்ந்து பிரேத பரிசோதனைக்காக மேட்டுப்பாளையம் அரசு மருத்துவமனைக்கு அனுப்பி வைக்கப்பட்டது.

மீட்புப்பணிகளை பார்வையிட்ட கோவை மாவட்ட ஆட்சியர் ராசாமணி செய்தியாளர்களிடம் பேசுகையில், "சுவர் இடிந்து விழுந்ததில் வீட்டில் தூங்கிக் கொண்டிருந்தவர்கள் உயிரிழந்துள்ளனர், இது தொடர்பாக மேட்டுப்பாளையம் வட்டாட்சியர் விசாரணை நடத்தி அறிக்கை சமர்ப்பித்த உடன் சம்பந்தப்பட்டவர்கள் மீது நடவடிக்கை எடுக்கப்படும்" என தெரிவித்தார்.

போராட்டத்தில் ஈடுபட்ட பொதுமக்கள் கூறுகையில் அந்த சுவரே ஒரு தீண்டாமை சுவர் என்று குறிப்பிடவர்கள் அரசின் மெத்தனபோக்கே இந்த விபத்க்குக்கு காரணம் என்றும் சம்பந்தப்பட்டவர்கள் வன்கொடுமை தடுப்பச் சட்டத்தில் கை செய்ய வேண்டும் என்றனர்.

இந்நிலையில், சம்பந்தப்பட்டவர்கள் மீது உரிய நடவடிக்கை எடுக்கப்பட்டால் மட்டுமே உடலை பெற்றுக் கொள்வோம் என தெரிவித்து, மேட்டுப்பாளையம் ஊட்டி சாலையில் மறியல் போராட்டத்தில் ஈடுபட்டனர். 200க்கும் மேற்பட்டோர் இந்த மறியல் போராட்டத்தில் பங்கேற்றதால் உதகை சாலையில் போக்குவரத்து நிறுத்தப்பட்டது. இதனையடுத்து காவல்துறையினர் சம்பந்தப்பட்டவர்கள் மீது உரிய நடவடிக்கை எடுக்கப்படும் என உறுதியளித்ததை அடுத்து சாலை மறியல் கைவிடப்பட்டது.

இதனிடையே 17 பேர் உயிரிழக்க காரணமான அந்த சுற்று சுவரை கட்டிய துணிக்கடை அதிபர் மீது நடவடிக்கை எடுக்க வேண்டும் உயிரிழந்தவர்களின் குடும்பத்திற்கு 25 லட்சம் ரூபாய் வழங்க வேண்டும் குடும்ப உறுப்பினர்கள் ஒருவருக்கு அரசு வேலை வழங்க வேண்டும் எனவும் உறவினர்கள் கோரிக்கை வைத்துள்ளனர்.

இதையும் படிங்க: கோவை கட்டட விபத்து - பலி எண்ணிக்கை 17ஆக அதிகரிப்பு!