கோவையில் இருந்து சீரடிக்கு தனியார் ரயில் சேவை இன்று முதல் தொடக்கம்!

கோவையிலிருந்து சீரடிக்கு செல்லும் இந்தியாவின் முதல் தனியார் ரயில் இன்று(ஜூன் 14) முதல் தொடங்கப்பட்டுள்ளது.

கோயம்புத்தூர்: கோவையில் இருந்து சீரடி சாய்பாபா கோயிலுக்கு தனியார் நிறுவனம்(எம்.என்சி டெவலப்பர்ஸ்) சவுத் ஸ்டார்(South Star) என்ற ரயில் சேவையை துவங்கி உள்ளது. வடகோவை முதல் சீரடி வரை இந்த ரயில் பயணமாகிறது. இதன் துவக்க நிகழ்ச்சியில் தனியார் நிறுவனத்தை சேர்ந்தவர்களும் இயக்குனரும் நடிகருமான சேரன் உட்பட பாஜகவினர் கலந்து கொண்டனர்.

பயணத்தை துவக்கும் முதல் நாளான இன்று(ஜூன் 14) ரயிலுக்கு பூக்களால் அலங்கரிக்கப்பட்டு பூக்கள் தூவப்பட்டு ரயில் சேவையானது துவங்கியது. இந்த ரயிலில் பயணச்சீட்டு மற்றும் பராமரிப்புப்பணிகளை தனியார் நிறுவனமே மேற்கொள்ள உள்ளது. மேலும் சிறப்பம்சமாக இந்த ரயிலில் ஹவுஸ் கீப்பிங் செக்யூரிட்டி மற்றும் மருத்துவர்கள் உள்ளனர். மேலும் இதில் சமையலறை வசதியும் உள்ளது.

இதில் பயணிப்பவர்களுக்கு சீரடியில் தரிசனம் செய்ய விஐபி தரிசனம் வழங்கப்பட்டு தங்கும் அறைகளும் வழங்கப்படுகின்றன. மேலும் பயணிகள் உறங்குவதற்குத் தேவையான தலையணைகள், போர்வைகள் வழங்கப்படும். இதில் ஒலிபெருக்கிகள் பொருத்தப்பட்டு பக்தி பாடல்கள் ஒலிக்கப்பட உள்ளதாக தெரிவிக்கப்பட்டுள்ளது.

வாரம் ஒருமுறை இயக்கப்படும் இந்த ரயில் வட கோவையில் துவங்கி திருப்பூர், ஈரோடு, சேலம், பெங்களூர், மந்திராலயம் வழியாக சீரடி சென்றடையும். இதற்கான டிக்கெட்டுகள் கோவை, திருப்பூர், ஈரோடு, சேலம் பகுதியில் உள்ள சாய்பாபா கோயில்களில் கிடைக்கும் என தனியார் நிர்வாகம் தெரிவித்துள்ளது. இதன் கட்டணம் இரண்டு வகையாக வசூலிக்கப்படுகிறது.

சாதாரண படுக்கை கட்டணமாக ரூ.2500 மற்றும் பேக்கேஜ் கட்டணம் என்றால் 4,999 ரூபாயாகவும், மூன்றடுக்கு குளிர்சாதன படுக்கை பெட்டிகளுக்கு ரூ.5000 மற்றும் பேக்கேஜ் கட்டணமாக 7,999 ரூபாயும், இரண்டடுக்கு குளிர்சாதனப்பெட்டிகளுக்கு ரூ.7000, பேக்கேஜ் கட்டணமாக 9,999 ரூபாயும், முதல் வகுப்பு குளிர்சாதன பெட்டிக்கு ரூ.10,000 மற்றும் பேக்கேஜ் கட்டணமாக 12,999 ரூபாயும் நிர்ணயம் செய்யப்பட்டுள்ளது.

அதேசமயம் அரசு ரயிலை எடுத்துக்கொண்டால் சீரடிக்கு 1,280 ரூபாயும், மூன்றடுக்கு குளிர்சாதன படுக்கை பெட்டிகளுக்கு 2,360 ரூபாயும் இரண்டு அடுக்கு குளிர்சாதன படுக்கை பெட்டிகளுக்கு 4,820 ரூபாயும் முதல் வகுப்பு குளிர்சாதன படுக்கை பெட்டிகளுக்கு 8,190 ரூபாயும் வசூலிக்கப்படுகிறது.

இந்நிகழ்வில் செய்தியாளர்களிடம் பேசிய தென்னக ரயில்வே தலைமை பொது அலுவலர் குகணேசன்,

’பாரத் கெளரவ் திட்டத்தில் இந்த தனியார் ரயில் சேவை செயல்படுகிறது. ஐந்து நாட்களுக்குள் இந்த ரயில் சீரடி சென்று திரும்பும். இந்த ரயில் பயணத்தில் மந்திராலயத்தில் 5 மணி நேரம் ரயில் ஆனது நிற்கும். அச்சமயத்தில் பக்தர்கள் மந்திராலயத்தில் வழிபடலாம். இது சுற்றுலா ரயிலாகத்தான் இயக்க உள்ளோம்.

இதற்கு மக்களிடத்தில் இருந்தும் பல்வேறு மாநிலங்களில் இருந்தும் வரவேற்பு கிடைத்துள்ளது. இதில் ஒரு பெட்டியை பதிவு செய்பவர்களுக்கு ஒரு கோடி காப்பீடு வழங்கப்படும். இதில் குளிர்சாதனப் பெட்டிகள் உட்பட 20 பெட்டிகள் உள்ளது. தனியார் நிறுவனம் அளிக்கின்ற சேவையை இந்தியன் ரயில்வேயும் தர முடியும்.

அதே சமயம் தனியார் அளிக்கின்ற சேவையை இந்தியன் ரயில்வே சேவையுடன் ஒப்பிட முடியாது. இது மாதத்தில் மூன்று முறை இயக்கத் திட்டமிடப்பட்டுள்ளது’ எனத் தெரிவித்தார். இதில் பயணிக்கும் பயணிகள் இந்த சேவை மகிழ்ச்சியாக உள்ளது, எனத் தெரிவித்தனர்.

இதையும் படிங்க:முதலமைச்சர் ரங்கசாமியை தள்ளிய அமைச்சரின் பாதுகாவலர் பணியிடமாற்றம்!