தடை செய்யப்பட்ட போதை மாத்திரை... 159 மாணவர்கள் கைது!

2019-05-04 10:54:41

கோவை: பொள்ளாச்சி சேத்துமடை அண்ணாநகர் பகுதியில் தடை செய்யப்பட்ட போதை மாத்திரைகளுடன் கேளிக்கை விருந்தில் ஈடுபட்ட 159 கேரள மாணவர்களை காவல் துறையினர் கைது செய்தனர்.

கேரள மாணவர்கள் 159 பேர் பொள்ளாச்சி சேத்துமடை அண்ணாநகர் பகுதியில் அமைந்துள்ள கணேஷ் என்பவரது தோட்டத்தில் மது மற்றும் தடை செய்யப்பட்ட கஞ்சா, மாத்திரைகள் உள்ளிட்ட போதைப் பொருட்களை உபயோகித்து நேற்று இரவு முழுவதும் ரகளையில் ஈடுபட்டு வந்துள்ளனர். 

இந்நிலையில், அப்பகுதியில் வசிக்கும் பொதுமக்கள் காவல் துறையினருக்கு அளித்த தகவலின் பேரில் கோவை மாவட்ட காவல்துறை கண்காணிப்பாளர் சுஜித் குமார் தலைமையில் நடத்திய ஆய்வில் அனுமதி இல்லாத அக்ரிநெஸ்ட் ரிசார்ட்டில் 159 பேர் போதை பொருட்களை பயன்படுத்தியது தெரியவந்துள்ளது.

பின்னர் இந்தச் செயலில் ஈடுபட்ட இளைஞர்களை ஆனைமலை காவல் துறையினர் கைது செய்து அதிரடி நடவடிக்கை மேற்கொண்டு விசாரணை நடத்திவருகின்றனர். மேலும், தோட்ட உரிமையாளர் கணேஷ் உட்பட 6 பேரை கைது செய்து காவல் துறையினர் விசாரித்துவருகின்றனர்.