பள்ளி, கல்லூரிகளை திறக்க வலியுறுத்தி எஸ்.எஃப்.ஐ அமைப்பினர் ஆர்ப்பாட்டம்

கோவை: கரோனா அச்சுறுத்தல் காரணமாக பத்து மாதங்களுக்கு மேலாக திறக்கப்படாமல் உள்ள பள்ளி, கல்லூரிகளை திறக்க வலியுறுத்தி எஸ்.எஃப்.ஐ அமைப்பினர் மாவட்ட ஆட்சியர் அலுவலகம் முன்பு ஆர்ப்பாட்டத்தில் ஈடுபட்டனர்.

கரோனா ஊரடங்கினால் கடந்த மார்ச் 25ஆம் தேதி முதல் பள்ளிகள் மூடப்பட்டுள்ளன. அதைத்தொடர்ந்து பத்தாம் வகுப்பு பொதுத் தேர்வுகள் ரத்து செய்யப்பட்டன. நடப்பு கல்வியாண்டில் நவம்பர் 16ஆம் தேதி முதல், 9 முதல் 12ஆம் வகுப்பு வரையிலான மாணவர்களுக்கு பள்ளிகள் திறக்கப்படும் என்று அரசு அறிவித்தது. இதற்கு கடும் எதிர்ப்பு கிளம்பியதும், கருத்துக் கேட்பின் அடிப்படையில் பள்ளி திறப்பு ஒத்தி வைக்கப்பட்டுள்ளது.

இந்நிலையில் பள்ளி, கல்லூரிகளை திறக்க வலியுறுத்தி கோவை மாவட்ட ஆட்சியர் அலுவலகம் முன்பு எஸ்.எஃப்.ஐ. அமைப்பினர் இன்று ஆர்ப்பாட்டத்தில் ஈடுபட்டனர். இந்த ஆர்ப்பாட்டத்தின்போது, கரோனா காலம் என்பதால் கடந்த 10 மாதங்களுக்கும் மேலாக பள்ளி கல்லூரிகள் பூட்டியே இருந்து வருகிறது. அரசு இறுதி ஆண்டு கல்லூரி மாணவர்களுக்கு மட்டும் தற்போது தளர்வு அறிவித்துள்ளது.

இதனால் கிராமப்புற மாணவர்கள் பாதிப்படைந்துள்ளனர். இடைநிற்றல் அதிகமாகி உள்ளது. குழந்தை தொழிலாளர் எண்ணிக்கை அதிகமாகி வருகிறது. ஆன்லைன் வகுப்புகள் மாணவர்களிடையே பெரும் பிளவை ஏற்படுத்தியுள்ளது.

எனவே அரசு தகுந்த பாதுகாப்பு நடவடிக்கைகளை ஏற்படுத்தி பள்ளி, கல்லூரிகள் திறந்து மாணவர்களின் கல்வி தரத்தை உயர்த்த வேண்டும் என்ற கோரிக்கையை முன்வைத்தனர்.

இதையும் படிங்க: பொங்கல் பண்டிகையை முன்னிட்டு சிறப்பு மாநகரப் பேருந்துகள் இயக்கம்