'கரோனாவுக்குப் பிந்தைய காலம் சுலபமாக இல்லை' - ஆடை வடிவமைப்பாளர்கள் சந்திக்கும் நெருக்கடிகள்!

கரோனா நெருக்கடியினால் பிறப்பிக்கப்பட்ட ஊரடங்கு தளர்வில் பொட்டிக்ஸ் மீண்டும் திறக்கப்பட்டன. ஆனால், திருமணத்திற்கு வரும் ஆர்டர்களின் விதம் முற்றிலும் மாறியுள்ளன. இது வடிமைப்பாளர்களுக்கு ஓரளவு வருமானத்தைக் கொடுத்தாலும், டெய்லர்களுக்கு நெருக்கடிதான்.

முன்பெல்லாம் ஆடைகளை வாங்குவதென்பது பெரும்பாலான குடும்பங்களில் ஏதேனும் விழாக்காலங்களில் மட்டும்தான் சாத்தியப்படும். முந்தைய தலைமுறையில் ஆண்டுக்கு ஒருமுறைதான் புத்தாடைகள் கைக்கு கிடைக்கும். ஆனால், காலப்போக்கில் அது மூன்று பருவங்களாக மாறியது. திருவிழா, பிறந்தநாள், திருமணம் என்பதே அந்த புதுத்துணிகள் காலம். அதுவே, தற்போது தேவைக்கேற்ப இல்லாமல் ஆசைக்கு ஏற்ப மாறிப் போனது.

முன்பெல்லாம், திருமணத்திற்கு மாப்பிளையை விட மணப்பெண்ணின் ஆடைக்குத்தான் அதிக கவனம் செலுத்துவார்கள். திருமண செலவில் பெண்ணுக்கு மட்டும் ஆடை, அலங்காரப் பொருள்கள் என்று ஒரு லிஸ்டே நீளும். இதற்காக பாரம்பரியமான கடைகளுக்குச் செல்வது மணிக்கணக்கில் புடவைகளைத் தேர்ந்தெடுப்பது என அதிக மெனக்கெடல்கள் இருக்கும்.

பெரும்பாலான திரைப்படங்களில் புடவை எடுக்கும் டாபிக்கை அடிப்படையாகக் கொண்டு ஒரு நகைச்சுவைக் காட்சியே இடம்பெறும். ஆனால் தற்போது, காலம் மாறிப் போனது. பெண் மட்டுமல்ல, ஆண்களும் தங்களின் ஆடைகளில் அதிகம் கவனம் செலுத்துகின்றனர். திருமணம் என்ற பேச்சு ஆரம்பிக்கும் போதே தனக்கான ஆடை வடிவமைப்பாளர்களை இத்தலைமுறையினர் முடிவு செய்துவிடுகின்றனர்.

இதற்கெனவே, நகர்புறங்களில் பொடிக்ஸ் என்னும் துணிக் கடைகள் அமைந்துள்ளன. இதனால் திருமண ஆடைகளுக்கான அலைச்சல் குறைந்துள்ளது. இந்த கடைகளில் மணப்பெண், மணமகன் தொடங்கி அவர்கள் வீட்டு சுட்டீஸ் வரை அனைவருக்கும் விருப்பப்படி ஆடைகளை வடிவமைத்துக் கொள்ளலாம். இங்கு ஆடை, ஆடைக்கு தகுந்தாற்போல் அணிகலன்கள் என அனைத்தும் பிரத்யேகமாகவும், அவரவர் விருப்பத்திற்கு ஏற்றார் போலவும் வடிவமைத்துக் கொடுக்கப்படும்.

பெரும்பாலும் தனித்துவமான இதன் வடிவமைப்புகளுக்கு விலை சற்று அதிகம். இதன் வணிகம் உயர் வர்க்கத்தினரிடையேதான் நிகழ்ந்து வருகிறது. இது போன்ற துணிக் கடைகளுக்குச் செல்லும் வாடிக்கையாளர்கள் அங்கிருக்கும் துணிகளைத் தேர்ந்தெடுத்து வடிவமைக்கச் சொல்லும் டிசைனுக்கு ஏற்றார் போல விலை நிர்ணயிக்கப்படுகிறது.

திருமணம் தான் இக் கடைகளின் மிக முக்கியமான வணிகத்திற்கு ஆதாரம். இந்நிலையில், கரோனா நெருக்கடி இந்தத் துறையையும் விட்டு வைக்கவில்லை. தள்ளிப் போன திருமணங்கள், களையிழந்த திருவிழாக்கள் என புத்தாடைகளுக்கு அவசியமில்லாமல் போனது. பொட்டிக்ஸ் தற்போது எப்படி இயங்குகின்றன? அதன் வியாபாரம் எப்படி இருக்கிறது என்பது குறித்து ஆடை வடிவமைப்பாளரும் கோவையின் ஸ்டூடியோஸ் ஏ பொட்டிக்ஸின் உரிமையாளருமான அபர்ணாவிடம் பேசினோம்.

“கரோனாவிற்கு முன் வியாபாரம் செய்ய ரொம்பவே சுலபமாகயிருந்தது. துணிகளை வடிவமைக்கத் தேவையான மூலப் பொருள்கள் வருவதில் சிக்கல் இல்லை. இப்போது நிலைமை தலைகீழாக மாறிவிட்டது. கரோனா அச்சத்தில் வாடிக்கையாளர்கள் வருகை குறைந்துள்ளது. திருமணம் போன்ற நிகழ்வுகளினால் வரும் ஆர்டர் குறைந்துள்ளது”என்றார்.

கரோனா நெருக்கடியினால் பிறப்பிக்கப்பட்ட ஊரடங்கு தளர்வில் பொட்டிக்ஸ் மீண்டும் திறக்கப்பட்டது. ஆனால், திருமணத்திற்கு வரும் ஆர்டர்களின் விதம் முற்றிலும் மாறியுள்ளதாகவே அபர்ணா தெரிவித்தார்.

”உதாரணமாக, கரோனா காலத்திற்கு முன்பு ஒரு திருமண நிகழ்விற்கு மொத்த குடும்பமும் புத்தாடைகள் அணிந்து மிக ஆடம்பரமாக திருமணங்கள் அரங்கேறும். ஆனால், இப்போது மணப்பெண், அவரது தாயார் மட்டுமே புதியதாக ஆடைகளை வடிவமைத்துக் கொள்கிறார்கள். புதுமையான விசயம் என்னவெனில் நாங்கள் திருமண ஆடைக்கேற்றார் போல மணமகளுக்கு முகக்கவசமும் செய்து கொடுக்கிறோம்” என்கிறார் அபர்ணா.

திருமண ஆர்டர் இல்லாத சூழல்

திருமண ஆர்டர் இல்லாத சூழல் கடினமானதுதான் எனக் கூறும் அபர்ணா, அதை சமாளித்தது குறித்து நம்மிடம் பகிர்ந்து கொள்கிறார். “இந்த கரோனா காலத்தில் வீட்டில் இருப்பதற்கு தகுந்தாற்போல் ஆடைகளை வடிவமைத்து விற்பனை செய்கிறோம். தற்போது கல்லூரிகள் தொடங்க இருப்பதால் இளம்பெண்களுக்கு ஆடைகள் வடிவமைக்க தொடங்கியுள்ளோம். அது மட்டுமின்றி மால்கள் போன்ற கடைகள் மூடி இருப்பதால் மக்கள் எங்களை நாடி வருகின்றனர்”என்றார்.

இது குறித்து வாடிக்கையாளர்கள் கூறும் போது, “ துணிக் கடைகளுக்குச் செல்வதில் அச்சம் இருந்தது. அதனால் கடந்த மாதங்களில் கடைகளுக்குச் செல்வதைத் தவிர்த்தோம். இப்போது ஓரளவு இயல்பாகக் கடைக்கு வரமுடிகிறது. அதற்கான முன்னெச்சரிக்கை நடவடிக்கைகள் குறித்து விழிப்புணர்வு உள்ளது. கடைகளில் பெரிதும் விலைமாற்றம் தெரியவில்லை”என்றார்.

தமிழ்நாட்டு நகரங்களில் கோவைக்கென்று தனித்துவமான இடமுண்டு. இங்கு வெளிமாநிலத் தொழிலாளர்கள் தங்கி ஆடை வடிவமைப்பு கடைகளிலும் வேலை செய்து வருகின்றனர். இந்நிலையில், ஆர்டர் எடுத்து உடைகளைத் தைத்துக் கொடுக்கும் ஒருவரிடம் பேசினோம். “கடந்த 27ஆண்டுகளாக ஆடைகளை வடிவமைத்துக் கொடுக்கும் ஆர்டர் எடுத்து செய்து வருகிறேன்.

இது போல தொழில் முடக்கம் நிகழ்ந்ததில்லை. 15 பேரை வைத்து வேலை வாங்கிய இடத்தில் சிலருக்கு கூட வேலை வழங்க முடியாத இக்கட்டான சூழலில் இருக்கிறேன். வாடிக்கையாளர்கள் எங்களுக்கு வாய்ப்பு கொடுத்தால்தான் மீள முடியும்” என்கிறார், டெய்லர் பாலசுப்பிரமணியம்.

தள்ளுபடியில் ஆடைகள் எடுக்கும் நபர்கள்தான் எதார்த்தத்தில் நிரம்பிக் காணப்படுகின்றனர். கொண்டாட்ட மனநிலையும், விழாக்களும்தான் அவர்களை புத்தாடைகளை நோக்கி இழுத்துச் செல்லும். பாலசுப்பிரமணியம்கள் வாழ்க்கையில் ஒளிக்கீற்று தெரிய இயல்புநிலைதான் ஒரே வழி.

இதையும் படிங்க:வேலைக்கு காத்திருக்காமல் உருவாக்குங்கள் -ஆடை வடிவமைப்பாளர் டிம் ஜோசப் மெண்டோசா பேச்சு!