குறும்படம் எடுப்பதில் ஆர்வம் காட்டிய கணவன் - மனைவி தற்கொலை

கணவர் வேலைக்குச் செல்லாமல் குறும்படம் எடுப்பதில் ஆர்வம் காட்டி, பொழுதைக் கழித்து வந்ததால் விரக்தி அடைந்த மனைவி தற்கொலை செய்துகொண்டது சோகத்தை ஏற்படுத்தியுள்ளது.

சென்னை: பெரம்பூர் நீலம் தோட்டம் தெருவைச் சேர்ந்தவர் ராமசந்திரன் (21). இவர் தந்தை, பாட்டி அரவணைப்பில் வளர்ந்த கீர்த்தனா (21) என்ற பெண்ணை காதலித்து திருமணம் செய்துள்ளார்.

கீர்த்தனா பல்பொருள் அங்காடி ஒன்றில் விற்பனையாளராக பணியாற்றி வந்த நிலையில், அவரின் கணவர் ராமசந்திரன் குறும்படம் எடுப்பதில் ஆர்வம் காட்டி சமூக வலைதளங்களில் மூழ்கிக் கிடந்ததாக கூறப்படுகிறது.

தாய் பாசமின்றி வளர்ந்த கீர்த்தனா தனது கணவரின் செயல்பாடுகள் குறித்து யாரிடம் சொல்வதென்று தெரியாமல் நீண்ட நாட்களாக விரக்தியில் இருந்து வந்ததாகவும் தெரிகிறது.

தற்கொலை முயற்சி

மன வருத்தத்தில் கணவருடனும்உரையாடல்களைத் தவிர்த்து வந்த கீர்த்தனா, கடந்த வியாழகிழமை இரவு வீட்டிலிருந்த பூச்சி மருந்தைக் குடித்து தற்கொலைக்கு முயன்றுள்ளார். மயக்க நிலையில் இருந்த கீர்த்தனாவை கண்ட கணவர் ராமசந்திரன் உடனடியாக அருகிலுள்ள பெரியார் நகர் அரசு மருத்துவமனையில் சிகிச்சைக்காக அனுமதித்தார்.

அதனைத் தொடர்ந்து மேல் சிகிச்சைக்காக ராஜீவ் காந்தி அரசு மருத்துவமனையில் அனுமதிக்கப்பட்ட கீர்த்தனா நேற்று (ஜூலை 17) சிகிச்சை பலனின்றி உயிரிழந்தார்.

வரதட்சணை கொடுமை?

வரதட்சணைக் கொடுமையால் தான் தன் தங்கை தற்கொலை செய்துகொண்டதாகவும், அவரின் இறப்பில் சந்தேகம் இருப்பதாக கூறி கீர்த்தனாவின் சகோதரி சத்யா ராமசந்திரனின் குடும்பத்தார் மீது திரு.வி.க நகர் காவல் நிலையத்தில் புகார் அளித்துள்ளார்.

இது தொடர்பாக காவல்துறையினர் வழக்குப் பதிவு செய்து விசாரணை மேற்கொண்டு வருகின்றனர். திருமணமாகி ஆறு மாதமே ஆன நிலையில் இளம் பெண் தற்கொலை செய்துகொண்டதால் ஆர்.டி.ஓ விசாரணைக்கு செம்பியம் உதவி ஆணையர் பரிந்துரை செய்துள்ளார்.

இதையும் படிங்க: அரசு மருத்துவமனையில் கைதி மாயம்? - பரபரப்பு