இருசக்கர வாகனம் மீது கார் மோதி விபத்து - இருவர் உயிரிழப்பு

சென்னை : புழல் அருகே இருசக்கர வாகனம் மீது கார் மோதி விபத்துக்குள்ளானதில் இருவர் உயிரிழந்துள்ளனர்.

சென்னை திருமுல்லைவாயில் பகுதியைச் சேர்ந்த டில்லிபாபு, புழல் பகுதியைச் சேர்ந்த ஆனந்தன் ஆகிய இருவரும் மிளகாய் விற்பனைத் தொழில் செய்து வந்துள்ளனர்.

இந்நிலையில், இவர்கள் இருவரும் தொழில் தொடர்பாக புழலில் இருந்து மாதவரம் நோக்கி இருசக்கர வாகனத்தில் சென்று கொண்டிருந்தனர். அப்போது பின்னால் அதிவேகமாக வந்த கார் இவர்கள் மீது மோதியதில், இருவருக்கும் தலையில் பலத்த காயம் ஏற்பட்டு சம்பவ இடத்திலேயே உயிரிழந்தனர். இதனையடுத்து அங்கு வந்த காவல் துறையினர் உடல்களை மீட்டு உடற்கூறாய்வுக்காக ஸ்டான்லி அரசு மருத்துவமனைக்கு அனுப்பிவைத்தனர்.

மேலும் விபத்தை ஏற்படுத்தி விட்டு காருடன் தப்பிய நபர் குறித்து கண்காணிப்பு கேமராக்களில் பதிவான காட்சிகளை கொண்டு மாதவரம் போக்குவரத்து காவல்துறையினர் விசாரணை மேற்கொண்டு வருகின்றனர்.