துபாயில் இருந்து சென்னை வந்த இரண்டு விமானங்களில் 2 கிலோ தங்கம் பறிமுதல்

அடுத்தடுத்து துபாயில் இருந்து சென்னை வந்திறங்கிய இரண்டு விமானங்களில் 2 கிலோ தங்கம் பறிமுதல் செய்யப்பட்டுள்ளது.

சென்னை:துபாயில் இருந்து இன்டிகோ ஏர்லைன்ஸ் பயணிகள் விமானம் சென்னை சர்வதேச விமான நிலையத்திற்கு வந்தடைந்தது. இதில் வந்த பயணிகள் அனைவரும் இறங்கிச் சென்ற பின்பு, மீண்டும் சென்னையில் இருந்து உள்நாட்டு விமானமாக டெல்லி புறப்படுவதற்காக இவ்விமானம் தயாரானது.

இதனையடுத்து விமான ஊழியர்கள் விமானத்தை சுத்தப்படுத்தத் தொடங்கியுள்ளனர். அப்போது விமானத்தில் இருந்த கழிவறையின் தண்ணீர் தொட்டியில் பார்சல் ஒன்று இருந்துள்ளது. இதனை பாதுகாப்பு அலுவலர்கள் எடுத்து பிரித்து பாா்த்தபோது, அதனுள் 740 கிராம் அளவிலான தங்க கட்டிகள் இருந்தது தெரிய வந்துள்ளது.

இந்த தங்க கட்டிகளின் சர்வதேச மதிப்பு ரூபாய் 34 லட்சம் ஆகும். இதனிடையே தங்க கட்டிகளை பாதுகாப்பு அலுவலர்கள் சென்னை விமான நிலைய சுங்கத்துறையினரிடம் ஒப்படைத்தனர். இதனை கைப்பற்றிய சுங்க அலுவலர்கள், இதுதொடர்பாக வழக்குப்பதிவு செய்துள்ளனர்.

மேலும் விமானம் மற்றும் விமான நிலையத்தில் உள்ள சிசிடிவி கேமராக்களில் பதிவான காட்சிகளை வைத்து தங்க கட்டிகளை வைத்துச் சென்ற மர்ம நபரை சுங்கத்துறையினர் தேடி வருகின்றனர். இந்நிலையில் அடுத்ததாக துபாயில் இருந்து எமிரேட்ஸ் ஏர்லைன்ஸ் பயணிகள் விமானம் சென்னை சர்வதேச விமான நிலையத்திற்கு வந்தடைந்தது.

இதில் வந்த பயணிகளை சென்னை விமான நிலைய சுங்கத்துறையினர் வழக்கம்போல் சோதனையிட்டனா். அப்போது சென்னையைச் சேர்ந்த அஸ்பாக் ஹசன் (31) என்ற பயணி மீது சந்தேகம் ஏற்பட்டுள்ளது. எனவே அவரை நிறுத்தி சோதனையிட்டதில், முன்னுக்கு பின் முரணாக பேசியுள்ளார்.

இதனையடுத்து அவருடைய உடைமைகளை முழுமையாக சோதித்த சுங்கத்துறை அலுவலர்கள், தனி அறைக்கு அழைத்துச் சென்று ஆடைகளை களைந்தும் சோதனையிட்டனர். அப்போது அவருடைய உள்ளாடைக்குள் மறைத்து வைத்திருந்த பார்சலை எடுத்து பிரித்துப் பார்த்தனர்.

அதனுள் தங்கப்பசை மற்றும் தங்கச் செயின் இருந்தது கண்டுபிடிக்கப்பட்டது. மேலும் இதன் மொத்த எடை ஒரு கிலோ 250 கிராம் ஆகும். இதன் சர்வதேச மதிப்பு 56 லட்சம் ரூபாய் லட்சம் எனவும் தெரிய வந்துள்ளது. தொடர்ந்து அஸ்பாக் ஹசனை கைது செய்த சுங்கத்துறை அலுவலர்கள், தங்கத்தையும் பறிமுதல் செய்தனர்.

மேலும் இதுதொடர்பாக அவரிடம் தீவிர விசாரணை மேற்கொள்ளப்பட்டு வருகிறது.

இதையும் படிங்க:சைவ ஹோட்டல் உணவில் எலியின் தலை...! வாடிக்கையாளர்கள் அதிர்ச்சி...