பங்குச்சந்தை முதலீட்டு நிறுவனர் கடத்தல் வழக்கு - இருவர் கைது

பங்குச்சந்தையில் முதலீட்டு நிறுவனரை கடத்தி மிரட்டிய கும்பலில் இருவரை ஆதம்பாக்கம் காவல்துறையினர் கைது செய்துள்ளனர்.

சென்னை வில்லிவாக்கம் பகுதியில் தனியார் ஓட்டலில் மேனேஜராக பணிபுரிந்த சீதாராமன், zeebul trading agency என்ற நிறுவனத்தை நடத்தியுள்ளார். இதில் அவரது நண்பர் நெல்லையப்பன் மற்றும் நெல்லையப்பனின் உறவினர் கணேஷ் என்கிற இராமகுருநாதன் ஆகியோர் 27 லட்சம் ரூபாய் முதலீடு செய்துள்ளனர். இதிலிருந்து 10 லட்சம் ரூபாய் லாபமும் கிடைத்துள்ளது.

திடீரென பங்குச்சந்தை தொழில் நஷ்டமானதால், லாபத்துடன் சேர்த்து 37 லட்சம் ரூபாய் பணத்தை திருப்பிக் கொடுக்க ஒரு வருட கால அவகாசம் கேட்டுள்ளார். இந்நிலையில் சீதாராமன் ஆதம்பாக்கம் பகுதியில் தனது மகனை சந்திக்க வரும்போது, எட்டு பேர் கொண்ட கும்பல் சீதாரமனை கடத்திச் சென்றுள்ளது.

அப்போது சீதாராமனை மிரட்டி வெற்று பத்திரத்தில் கையெழுத்தும் அக்கும்பல் வாங்கியுள்ளது. பின்னர் நங்கநல்லூர் சித்தி விநாயகர் கோயில் பகுதியில் சீதாராமனை இறக்கி விட்டுச் சென்றுள்ளனர். தொடர்ந்து இந்த விவகாரம் தொடர்பாக ஆதம்பாக்கம் காவல் நிலையத்தில் சீதாராமன் புகார் அளித்துள்ளார்.

இந்நிலையில் காவல்துறையினர் நடத்திய விசாரணையில், கணேஷ் என்ற ராமகுருநாதன் மற்றும் அவரது நண்பர்களான வழக்கறிஞர் தங்கராஜ், பிரபா மற்றும் கார் ஓட்டுநர் சதீஷ் உள்பட ஐந்து பேர் சேர்ந்து கொடுத்த பணத்திற்கு ஆதாரம் இல்லாததால், பணத்தை திரும்பப் பெறுவதற்காக சீதாராமனை கடத்தி பத்திரத்தில் கையெழுத்து வாங்கியது தெரிய வந்துள்ளது.

இவர்களில் கணேஷ் என்கிற ராமகுருநாதன் மற்றும் கார் ஓட்டுநர் சதீஷ்குமார் ஆகியோரை கைது செய்த காவல்துறையினர், அவர்களை சிறையில் அடைத்தனர். மேலும் மீதமுள்ள நபர்களை காவல்துறையினர் தீவிரமாக தேடி வருகின்றனர்.

இதையும் படிங்க: அரிவாளால் வெட்ட வந்த ரவுடியை துப்பாக்கியால் சுட்டு கைது செய்த காவல்துறை!