MBBS பாடத்தில் இருந்து நீக்கப்பட்ட அவசர சிகிச்சை பாடத்திட்டங்கள்.. மீண்டும் சேர்க்க மாணவர்கள் வலியுறுத்தல்!

Medical student insists National Medical Commission: தேசிய மருத்துவ ஆணையம் வெளியிட்டுள்ள பாடத்திட்டத்தில் முக்கிய பாடப்பிரிவில் இருந்து நீக்கப்பட்ட பாடங்களை மீண்டும் சேர்க்க வேண்டும் என தமிழ்நாடு மருத்துவ மாணவர்கள் வலியுறுத்தி வருகின்றனர்

சென்னை:எம்பிபிஎஸ் படிப்பில் தேசிய மருத்துவ ஆணையம் கொண்டு வந்துள்ள புதிய மருத்துவப் பாடத்திட்டத்தின் வரைவிலிருந்து முக்கியமான படிப்புகளான நுரையீரல், அவசர சிகிச்சை, உடல் மருத்துவம் மற்றும் மறுவாழ்வு ஆகியவற்றை நீக்கி உள்ளதை மீண்டும் சேர்க்க வேண்டும் எனத் தமிழ்நாடு மருத்துவ மாணவர்கள் வலியுறுத்தி உள்ளனர்.

தேசிய மருத்துவ ஆணையம் மருத்துவப்படிப்பிற்கான புதிய வரைவுப்பாடத்திட்டத்தை ஆகஸ்ட் 16ம் தேதி வெளியிட்டது. இளநிலை மருத்துவப்படிப்பில் எம்பிபிஎஸ் படிப்பில் மாணவர்களுக்கான பாடத்திட்டம், மதிப்பெண் முறைகள், செய்முறைத்தேர்வு, பயிற்சிகள் உள்ளிட்டவைகள் குறித்தும் தெரிவிக்கப்பட்டுள்ளது.

இந்த நிலையில், தமிழ்நாடு மருத்துவ மாணவர் சங்கத்தின் தலைவர் டாக்டர் கீர்த்தி வர்மன் தேசிய மருத்துவ ஆணையம் வெளியிட்டுள்ள பாடத்திட்டத்தை மாற்ற வேண்டும் என வீடியோ வெளியிட்டுள்ளார். அதில் அவர் கூறுவதாவது , “தேசிய மருத்துவ ஆணையம் சமீபத்தில் எம்பிபிஎஸ் படிப்பிற்கான பாடத்திட்டத்தை வெளியிட்டுள்ளனர். அதில் முக்கியமான துறையான நுரையீரல் பிரிவு, அவசர சிகிச்சைப் பிரிவு, உடல் மருத்துவம் மற்றும் மறுவாழ்வு ஆகிய 3 துறைகளையும் கட்டாயப் பாடம் என்பத்தில் இருந்து நீக்கி உள்ளனர். இந்தப் பாடங்கள் அவசியம் இல்லாதது என மாற்றி உள்ளனர்.

கரோனா தாக்கத்திலிருந்து மீண்டு வந்துள்ளோம். பொது மக்களுக்கே நுரையீரலில் ஏற்படும் நிமோனியா பாதிப்பு குறித்துத் தெரியும் நிலையில் உள்ளனர். இந்தியாவில் காசநோய் பாதிப்பு , புகைப்பிடித்தலால் ஏற்படும் நுரையீரல் புற்றுநோய், காசநோய், மூச்சுக்குமாய் அழற்சி, ஆஸ்துமா மற்றும் நிமோனியா போன்ற நோய்கள் மிகவும் பொதுவானவை.

இதையும் படிங்க:காகித ஸ்ட்ராவிலும் கலந்திருக்கும் நச்சு இராசாயனங்கள் : ஆய்வாளர்கள் கூறுவது என்ன?

இந்த நோய்களின் பொதுவான தன்மை காரணமாக, எம்பிபிஎஸ் மாணவர்கள் இந்த நோய்களைப் பற்றி அறிந்து கொள்ள வேண்டும். இந்நிலையில் அவசர சிகிச்சை அளிப்பதை முக்கிய பாடத்திட்டத்திலிருந்து எடுத்துள்ளனர். எனவே இந்த வரைவைத் திரும்பப் பெற்று மீண்டும் மருத்துவப்படிப்பில் கொண்டு வர வேண்டும் .

தேசிய மருத்துவ ஆணையம் தொடர்ந்து நவீன மருத்துவத்தை மிக்ஸோபதியாக மாற்றுவதற்கான வழிகளைச் செய்து வருகின்றனர். அதன் வெளிப்பாடுத்தான் பயிற்சியின் போது சுமார் ஒரு வாரம் ஆயுஷ் (ஆயுர்வேதம், யோகா, யுனானி, சித்தா மற்றும் ஹோமியோபதி) பயிற்சிகளை மேற்கொள்ள வேண்டும் என கூறுகின்றனர். இது தான் மிக்ஸோபதி மருத்துவத்தை உருவாக்குவது. நவீன மருத்துவத்தையும், பழங்கால மருத்துவத்தையும் இணைப்பதையும் கண்டிக்கிறோம்.

தேசிய தகுதி மற்றும் நுழைவுத் தேர்வை (NEET) எதிர்க்கிறோம். மருத்துவப்படிப்பில் மாநில ஒதுக்கீட்டில் சேர்வதற்கான இடங்களுக்கான வழிமுறைகளை மாநில அரசுகளே முடிவுச் செய்யட்டும். நீட் தேர்வு மாநில உரிமைக்கு எதிராக இருக்கிறது. இளநிலை மருத்துவ மாணவர்களுக்கான இறுதித் தேர்வினை தேசிய தேர்வு முகமை நடத்தும் NExT ஆகிய தேர்வுகளையும் எதிர்க்கிறோம். மாநிலத்தில் உள்ள மருத்துவப் பல்கலைக்கழகங்களின் செயல்பாட்டிற்கு எதிராக உள்ளது” என தெரிவித்துள்ளார்.

இதையும் படிங்க:"சூரியனை ஆய்வு செய்வது மிக முக்கியம்": ஆதித்யா-எல்1 பற்றி விண்வெளி ஆய்வாளர் கூறிய சுவாரஸ்ய தகவல்!