'தமிழ்நாடு உயர்கல்வி மன்றத்தின் பாடத்திட்டத்தை பின்பற்றாதீர்கள்' - ஆளுநர் ரவி அதிரடி அறிவிப்பு

தமிழ்நாடு உயர்கல்வி மன்றம் தயாரித்த பாடத்திட்டத்தை பின்பற்ற தேவையில்லை தமிழ்நாடு ஆளுநர் ஆர்.என்.ரவி அதிரடியாக அறிவித்துள்ளார்.

சென்னை: தமிழ்நாட்டில் உள்ள உயர்கல்வி நிறுவனங்களில் ஒரே மாதிரியான பாடத்திட்டம் செயல்படுத்தப்பட வேண்டும் என்பதற்காக தமிழ்நாடு உயர்கல்வி மன்றத்தால் பாடத்திட்டம் தயாரிக்கப்பட்டு பல்கலைக்கழகங்களுக்கு அனுப்பி வைக்கப்பட்டது. அந்தப் பாடத் திட்டத்தை பல்கலைக்கழகங்கள் அரசு கலை மற்றும் அறிவியல் கல்லூரிகள் தன்னாட்சிகளை அறிவியல் கல்லூரிகளில் 75% அமல்படுத்த வேண்டும் என உயர்கல்வித்துறை வலியுறுத்தியது. இதற்கு தன்னாட்சி கல்வி நிறுவனங்கள் கடுமையாக எதிர்ப்பு தெரிவித்தது. மேலும், கல்வியாளர்கள் மத்தியிலும் கடும் எதிர்ப்பு கிளம்பியது. பாடத்திட்டம் தர்மத்தில் இருப்பதால் மாணவர்களின் எதிர்காலம் பாதிக்கப்படும் என கல்வியாளர்கள் கருத்து தெரிவித்திருந்தனர்.

இந்த நிலையில், 'தமிழ்நாடு அரசின் பொது பாடத்திட்டத்தை கல்லூரிகள் பல்கலைக்கழகங்கள் பின்பற்ற வேண்டியதில்லை' என ஆளுநர் ஆர்.என்.ரவி பல்கலைக்கழகங்களில் துணைவேந்தர்கள் மற்றும் உயர்கல்வித்துறை செயலாளர் தன்னாட்சி கல்லூரிகளுக்கு இன்று (ஆக.21) கடிதம் எழுதியுள்ளார்.

தமிழ்நாடு அரசின் பொது பாடத்திட்ட முறை குறித்து ஆக.9ஆம் தேதி தமிழக ஆளுநர் பல்கலைக்கழக மானிய குழுவிற்கு எழுதிய கடிதத்தை தொடர்ந்து, பல்கலைக்கழக மானியக் குழு தலைவர் ஜெகதீஷ் குமார் தமிழக ஆளுநருக்கு கடிதம் அனுப்பியுள்ளார். அதில் யுஜிசி-யின் விதிகளை யுஜிசி தலைவர் பட்டியலிட்டுள்ளார். யுஜிசி கடிதத்தை சுட்டிக்காட்டி ஆளுநர் உத்தரவிட்டுள்ளது. யுஜிசி விதிகள் நாட்டில் உள்ள தன்னாட்சி அதிகாரம் பெற்ற கல்லூரிகள் மற்றும் பல்கலைக்கழகங்கள் தங்களுக்கான பாடத்திட்டத்தை தாங்களே வடிவமைத்து கொள்ளலாம் என்ற விதி இருக்கின்றபோது அதற்கு மாற்றாக பொதுப் பட்டியலில் தமிழக உயர்கல்வி மன்றம் வடிவமைத்துள்ள 'பொது பாடத்திட்டம்' முறையை ஏற்கத் தேவை இல்லை என்றும் ஆளுநர் கருத்து தெரிவித்துள்ளார்.

கல்வி பொதுப்பட்டியலில் உள்ளதால், இதில் மாநில அரசு தன்னிச்சையாக யுஜிசி விதிகளுக்கு மாறாக பொது பாடத்திட்ட முறையை கொண்டுவர முடியாது. பொது பாடத்திட்ட முறையால் பல்வேறு பாதிப்புகள் உள்ளாகும் என தமிழகத்தில் உள்ள தன்னாட்சி அதிகாரம் பெற்ற கல்லூரிகளின் நிர்வாகங்கள் பல்கலைக்கழகங்களின் துணைவேந்தர்கள் ஆகியோர் பொது பாடத்திட்ட முறை குறித்து தனது கவனத்திற்கு கொண்டு வந்ததை அடுத்து பொதுப் பாடத்திட்ட முறையை பின்பற்ற தேவையில்லை.

தேசிய கல்விக் கொள்கை 2020-ன் படி மாணவர்களுக்கான பாடத்திட்டம் கற்பிக்கும் முறை தேர்வு முறை கற்பித்தல் வழிமுறைகள் உள்ளிட்டவை தெரிவிக்கப்பட்டுள்ளன. மேலும், பாடத்திட்டத்தின் படி மாணவர்களுக்கு கிரெடிட் முறையில் மதிப்பெண்கள் வழங்கும் குறித்தும் விளக்கம் அளிக்கப்பட்டுள்ளது என பல்கலைக்கழகம் மானியக் குழு தமிழ்நாடு ஆளுநருக்கு எழுதிய கடிதத்தில் தெரிவித்துள்ளது. தமிழ்நாட்டில் உள்ள அனைத்து கல்லூரிகள் பல்கலைக்கழகங்கள் ஆகியவற்றிற்கு பொது பாடத் திட்டத்தினை தமிழ்நாடு உயர்கல்வி மற்றும் மூலம் உருவாக்கி நடப்பாண்டு முதல் அமல்படுத்த வேண்டும் என தெரிவிக்கப்பட்டது. இந்த பொது பாட திட்டத்தை உருவாக்க பல்வேறு குழுக்கள் அமைக்கப்பட்டு அதன் அடிப்படையில் பாடத்திட்ட கருத்துக்கள் வகுக்கப்பட்டன.

இந்த பொதுப் பாடத்திட்டம் அரசு கல்லூரிகளில் பெரும்பாலும் அமல்படுத்தப்பட்டுள்ளது. ஆனால், தன்னாட்சி கல்லூரிகள் இந்த பாடத்திட்டத்தை அமல்படுத்தப்படும் முடியாது என கூறின. இதனைத்தொடர்ந்து, உயர்கல்வித்துறை அமைச்சர் பொன்முடி தலைமையில் தன்னாட்சி கல்லூரியின் நிர்வாகத்தினர் உடன் ஆலோசனை மேற்கொள்ளப்பட்டது. அதில் வந்திருந்த தன்னாட்சிக் கல்லூரியில் ஒரு சிலர் மட்டுமே அதற்கு ஒப்புதல் அளித்தனர். மற்றவர்கள் பாடத்திட்டத்தை மாற்ற வேண்டும் எனவும் தாங்கள் கூறும் மாற்றங்களை அதில் சேர்த்தால் வரும் கல்வி ஆண்டு முதல் அமல்படுத்துவோம் எனத் தெரிவித்தனர்.

இந்த நிலையில் உயர்கல்வித்துறை செயலாளர் கார்த்தி வெளியிட்டுள்ள செய்திக் குறிப்பில், 'உயர்கல்வித்துறை அமைச்சர், 26.8.2021 அன்று சட்டமன்றத்தில் அறிவித்தபடி, மாணவர்களின் அறிவு, திறன், கற்றல் மற்றும் கற்பித்தல் முறைகளை மேம்படுத்தவும், அவர்களை போட்டித் தேர்வுகளுக்குத் தயார்படுத்தவும், தொழில் துறையின் தேவைகளை பூர்த்தி செய்யவும், அதன் மூலம் வேலைவாய்ப்புகளைப் பெருக்கவும் உயர்கல்வி நிறுவனங்களின் பாடத்திட்ட மறுசீரமைப்புப் பணி மேற்கொள்ளப்பட்டு, மாதிரி பாடத்திட்டங்கள் (Model Syllabus) உருவாக்கப்பட்டன.

மாணவர்களின் எதிர்கால நலன் கருதி, மாநிலத்திலுள்ள 90 சதவீத அரசு உயர்கல்வி நிறுவனங்கள் தங்கள் கல்லூரியின் தன்மைக்கேற்ப சில மாற்றங்களுடன் மாதிரிப் பாடத்திட்டங்களை நடைமுறைப்படுத்தியுள்ளன. இந்நிலையில், மாதிரிப் பாடத்திட்டத்தின் நோக்கத்தினை விளக்க உயர்கல்வித்துறை அமைச்சர் தலைமையில் 2.8.2023 அன்று சென்னை, அண்ணா பல்கலைக்கழகத்தில் அனைத்து தன்னாட்சிக் கல்லூரி முதல்வர்களுடன் கலந்தாய்வுக் கூட்டம் நடைபெற்றது. அக்கூட்டத்தில், இந்த புதிய மாதிரி பாடத்திட்டம் 70 சதவீத தன்னாட்சிக் கல்லூரிகளில் நடைமுறைப்படுத்தப்பட்டுள்ளன எனத் தெரிவிக்கப்பட்டது.

சில தன்னாட்சிக் கல்லூரிகள், அவர்களது கல்லூரியில் தற்போது கற்பிக்கப்படும் பாடத்திட்டம் சிறப்பாக உள்ளதாகவும், இந்த மாதிரி பாடத்திட்டத்தினை நடைமுறைப்படுத்துவதால் அவர்களது கல்லூரி தன்னாட்சியின் உரிமைக்கு பாதிப்பு ஏற்படும் எனவும் கருதுவதாக கருத்துக்கள் தெரிவிக்கப்பட்டன. தன்னாட்சிக் கல்லூரிகள் சார்பாக தெரிவிக்கப்பட்ட கருத்துக்கள் கவனமுடன் பரிசீலிக்கப்பட்டன. இதன்படி, தன்னாட்சிக் கல்லூரிகள் இந்த புதிய மாதிரி பாடத்திட்டத்தினை தங்களது கல்லூரிகளில் நடைமுறைப்படுத்திக் கொள்வது குறித்து அவர்களே தங்கள் விருப்பத்திற்கேற்ப (Optional) முடிவு செய்து கொள்ளலாம் என தெரிவித்துக்கொள்ளப்படுகிறது' எனக் கூறியுள்ளார்.

இதையும் படிங்க: நேரடியாக விவாதிக்க நீங்கள் தயாரா? - ஈபிஎஸ்க்கு அமைச்சர் மா.சுப்பிரமணியன் சவால்!