குடியரசுத் தலைவருடன் மு.க.ஸ்டாலின் இன்று சந்திப்பு

முதலமைச்சர் மு.க.ஸ்டாலின் இன்று (ஜூலை 19) டெல்லியில் குடியரசு தலைவர் ராம்நாத் கோவிந்தை சந்திக்கிறார். அப்போது, நீட் தேர்வு, மேகதாது அணை விவகாரம் உள்ளிட்ட பிரச்சினைகள் குறித்து பேசுகிறார்.

சென்னை: முதலமைச்சராக மு.க.ஸ்டாலின் பொறுப்பேற்றபிறகு, முதல் முறையாக ஜூன் 17ஆம் தேதி டெல்லி சென்று பிரதமர் நரேந்திரமோடியை சந்தித்து பேசினார்.

இந்தச் சந்திப்பின்போது, தமிழ்நாட்டின் பல முக்கிய கோரிக்கைகள் குறித்து பிரதமரிடம் மு.க.ஸ்டாலின் மனுவாக கொடுத்தார். மேலும், மேகதாது அணை பிரச்சினை குறித்து விரிவாக எடுத்துரைத்த மு.க.ஸ்டாலின், அந்த திட்டத்தை கர்நாடக அரசு கைவிட வலியுறுத்துமாறும் பிரதமரிடம் கேட்டுக்கொண்டார்.

குடியரசு தலைவருடன் சந்திப்பு

இந்நிலையில், இரண்டாவது முறையாக நேற்று (ஜூலை 18) மாலை 5 மணியளவில் முதலமைச்சர் மு.க.ஸ்டாலின் சென்னையில் இருந்து தனி விமானத்தில் டெல்லி சென்றார்.

கடந்த முறை பிரதமர் நரேந்திரமோடியை சந்தித்த முதலமைச்சர் மு.க.ஸ்டாலின், இந்த முறை குடியரசு தலைவர் ராம்நாத் கோவிந்தை சந்தித்து பேசுகிறார். அவருடன் நாடாளுமன்ற உறுப்பினர்கள் கனிமொழி, தயாநிதிமாறன் ஆகியோரும் செல்கின்றனர்.

நீட் தேர்வு பிரச்சினை

இந்த சந்திப்பின்போது, நீட் தேர்வை ரத்து செய்வது, கர்நாடகாவில் மேகதாது அணை கட்ட முயற்சிப்பதை தடுத்து நிறுத்துவது, அதிக அளவில் கரோனா தடுப்பூசிகளை வழங்குவது உள்ளிட்டவை குறித்து குடியரசு தலைவர் ராம்நாத் கோவிந்திடம் முதலமைச்சர் மு.க.ஸ்டாலின் வலியுறுத்த இருக்கிறார்.

ராம்நாத் கோவிந்துக்கு அழைப்பு

மறைந்த முதலமைச்சர் கருணாநிதியின் 3ஆவது ஆண்டு நினைவு நாள் ஆகஸ்டு 7ஆம் தேதி வருகிறது. அவரது நினைவு நாள் நிகழ்ச்சியின்போது சட்டப்பேரவையில் கருணாநிதியின் உருவப்படத்தை திறக்க திமுக ஏற்பாடு செய்துள்ளதாக தெரிகிறது. இந்நிலையில் இந்த படத்திறப்பு நிகழ்ச்சியில் பங்கேற்க குடியரசு தலைவர் ராம்நாத் கோவிந்துக்கு மு.க.ஸ்டாலின் அழைப்பு விடுக்க இருப்பதாக தகவல் வெளியாகியுள்ளது.

இதையும் படிங்க: இன்று மழைக்கால கூட்டத்தொடர்- 31 மசோதாக்கள் நிறைவேற்ற திட்டம்!