சென்னை: தாம்பரம் தொகுதி திமுக வேட்பாளர் எஸ்.ஆர்.ராஜா, செங்கல்பட்டு திமுக வேட்பாளர் வரலட்சுமி மதுசூதனன், ஸ்ரீபெரும்புதூர் தொகுதி காங்கிரஸ் கட்சி வேட்பாளர் செல்வப்பெருந்தகை, திருப்போரூர் தொகுதி விடுதலை சிறுத்தைகள் கட்சி வேட்பாளர் எஸ்.எஸ். பாலாஜி ஆகியோரை ஆதரித்து திமுக தலைவர் ஸ்டாலின் தேர்தல் பரப்புரை மேற்கொண்டார். அப்போது அவர் பேசியதாவது:
பழனிசாமி ஆட்சி மக்களால் தேர்ந்தெடுக்கப்பட்டது அல்ல
"தமிழ்நாட்டில் எடப்பாடி பழனிசாமி ஆட்சி மக்களால் தேர்ந்தெடுக்கப்பட்ட ஆட்சி அல்ல. அவர் எப்படி ஆட்சிக்கு வந்தார் என்பது அனைவருக்கும் தெரியும். ஜெயலலிதா தான் முதலமைச்சராக்கினார் என வடிகட்டிய பொய்யை அவர் கூறி வருகிறார். ஆனால் நான் 50 ஆண்டு காலமாக பொதுவாழ்க்கையில் இருந்து, படிப்படியாக முன்னேறியுள்ளேன். தமிழ்நாடு அமைச்சரவையில் வேலுமணி, தங்கமணி முதல் கடைக்கோடி அமைச்சர்கள் வரை ஊழல் முறைகேடுகளில் ஈடுபட்டுள்ளது அனைவருக்கும் தெரியும்.
ஊழல் அமைச்சர்கள்மீது நடவடிக்கை
உள்ளாட்சித் துறையில் பல்பு வாங்கியது முதல் அனைத்திலும் ஊழல். அதேபோல அமைச்சர் தங்கமணி நிலக்கரி ஊழல் என பல்வேறு ஊழல்களில் சம்பந்தப்பட்டுள்ளார். திமுக ஆட்சி அமைந்தவுடன் ஊழல் செய்த அமைச்சர்கள் அனைவர் மீதும் நடவடிக்கை எடுக்கப்படும்.