நீட் விவகாரத்தில் தற்கொலை என்றும் தீர்வாகாது - தமிழிசை செளந்தரராஜன்!

நீட் விவகாரத்தில் தற்கொலை என்றைக்கும் தீர்வாகாது என்றும், இன்னும் பல வாய்ப்புகள் உள்ளன என்பதை மாணவர்களுக்குப் புரிய வைக்க வேண்டும் என்றும் தெலங்கானா ஆளுநர் தமிழிசை சௌந்தரராஜன் தெரிவித்தார்.

சென்னை: மகாகவி பாரதியாரின் 101ஆவது நினைவு தினத்தையொட்டி, மெரினா காமராஜர் சாலையில் அமைந்துள்ள பாரதியாரின் சிலைக்குக் கீழே வைக்கப்பட்டுள்ள அவரது திருவுருவப் படத்திற்கு தெலங்கானா ஆளுநர் தமிழிசை சௌந்தரராஜன் மரியாதை செலுத்தினார்.

பின்னர் செய்தியாளர்களைச் சந்தித்த அவர், "மகாகவி பாரதியாரின் நினைவு நாளைப் போற்றுவதில் பெருமை கொள்கிறேன். தற்போது ராணுவ உடைகள் கூட வெளிநாட்டிலிருந்து இறக்குமதி செய்வது நிறுத்தப்பட்டு, நம் நாட்டிலேயே ராணுவத் தளவாடங்கள் உற்பத்தி செய்யப்படுகின்றன. அவரது கவிதைகளில் சுயசார்பு இந்தியா குறித்து பேசியிருந்தார். சுதந்திரம் அடைந்து 75 ஆண்டுகளுக்குப் பின்பு, அவர் என்ன சுயசார்பு இந்தியாவைக் கனவு கண்டாரோ, அது தற்போது உருவாகிக் கொண்டிருக்கிறது.

நீட் விவகாரத்தில் தற்கொலை என்பது தீர்வாகாது. இன்னும் பல வாய்ப்புகள் உள்ளன என்பதை மாணவர்களுக்குப் புரிய வைக்க வேண்டும். உயிரைக் காப்பாற்றுவதற்குத்தான் மருத்துவமே தவிர, உயிரை மாய்த்துக்கொள்வதற்கு இல்லை. இதனை மாணவர்களுக்குப் புரிய வைக்க வேண்டும்.

அனைத்து தேர்வுகளையும் எதிர்கொள்வதற்கு மாணவர் சமுதாயத்தைத் தயார் செய்ய வேண்டும். மருத்துவத்திற்கு மட்டும் பொதுத்தேர்வு அல்ல, அனைத்து பொதுத்துறைக்கும் செல்ல பொதுத்தேர்வு எழுத வேண்டி இருக்கிறது. அதனால், அகில இந்திய அளவில் உள்ள தேர்வுகளை எதிர்கொள்ள அவர்களுக்குப் பயிற்சி அளிக்க வேண்டும்" எனத் தெரிவித்தார்.