'ஆக்சன் போட்டோகிராபர்' ராதிகா ராமசாமியுடன் ஒரு சிறப்பு நேர்காணல்!

சென்னை: இந்திய காட்டுயிர் ஒளிப்படத் துறையில் சாதித்த ராதிகா ராமசாமி ஈடிவி பாரத்-க்கு சிறப்பு நேர்காணல் அளித்துள்ளார்.

குழந்தைகளை படம் எடுப்பதும், பறவைகளை படம் எடுப்பதும் சவால் நிறைந்த கலை. அதற்கு நாம் குழந்தையாக மாற வேண்டும். குழந்தைகளைக் கூட எப்படியாவது படம் எடுத்து விட முடியும். ஆனால் பறவைகளைப் படமெடுக்கக் எல்லையில்லா பொறுமை வேண்டும்.

அப்படியான பொறுமை கைவரப் பெற்றதால் ராதிகா ராமசாமி, இந்திய காட்டுயிர் ஒளிப்படத் துறையில் சாதித்த முதல் பெண் என்ற பெருமையைப் பெற்றிருக்கிறார்.

ராதிகா எடுத்த பறவைகளின் ஒளிப்படங்கள் தனித்துவமானவை, பறவைகளின் அரிதான தருணங்கள், இறையை பிடித்தவை ,சண்டைபோடுபவை, கூடு கட்டுவது என பல புகைப்படங்களை எடுத்துள்ளார். அதுவே ராதிகாவிற்கு 'ஆக்சன் போட்டோகிராபர்' என்ற செல்லப்பெயரை ஒளிப்படக் கலைஞர்களிடமிருந்து பெற்றுத் தந்துள்ளது.

ராதிகா ராமசாமி தற்போது பல்வேறு இடங்களுக்கு சென்று வனவிலங்குகளை படம் எடுப்பது ,புகைப்படப் பயிற்சி வகுப்புகள்,செமினார்கள் ,பயிற்சிப் பட்டறைகள் என பம்பரமாக சுழன்று கொண்டிருக்கிறார். அவரைப் பற்றி தெரிந்துகொண்டேயாக வேண்டும் என்று அவரின் பிஸி ஷெட்யூலுக்கு மத்தியில் தொடர்ப்பு கொண்டு கேட்ட பொழுது மறுக்காமல் பேட்டியளிக்க சம்மதித்தார் .

இந்த வருடம் தமிழ்நாடு பத்தாம் வகுப்பு அறிவியல் பாடப்புத்தகத்தில் என்னைப் பற்றிய செய்தி இடம்பெற்றுள்ளது என்று பெருமிதம் பொங்க விவரித்தார் ராதிகா ராமசாமி. ஈ டிவி பாரத் செய்திக்காக அளித்த சிறப்பு பேட்டியில் தெரிவித்ததாவது,

ராதிகா ராமசாமி எப்படி வனஉயிர் புகைப்படக் கலைஞர் ஆனார்?

டெல்லியில் இருந்து தற்போதுதான் சென்னைக்குக் குடிபெயர்ந்து உள்ளோம் .என் சொந்த ஊர் தேனி மாவட்டம் ,வெங்கடாசலபுரம். பத்தாம் வகுப்பு படிக்கும்போது ஆர்வமாக ஆரம்பித்த கேமரா மீதான காதல் தற்போது என்னை இந்த இடத்திற்குக் கொண்டு வந்திருக்கிறது.

குடும்பத்துடன் வெவ்வேறு ஊர்களுக்கு சுற்றுலா செல்லும்போது அழகான பூக்கள் ,செடிகள்,விலங்குகள் என எல்லாவற்றையும் புகைப்படம் மூலம் பதிவு செய்ய அப்பாவிடம் கேமரா கேட்டேன்.

அவர் எனக்காக ஒரு கேமரா வாங்கிக் குடுத்தார். அப்போது ஆரம்பித்த எனது கேமராவுடனான பயணம் தற்போது வரை நீடிக்கின்றது. டிஜிட்டல் கேமரா வந்த சமயம், நான் டெல்லியில் இருந்தேன். அப்போது பக்கத்தில் உள்ள வரலாற்று இடங்களை புதிது புதிதாக படங்கள் எடுக்கவும் ,டிஜிட்டல் கேமராவில் உடனடியாக எடுத்த படங்களை பார்ப்பதும் என் ஆர்வத்தை மேலும் தூண்டியது. பறவைகள்,விலங்குகள் புகைப்படம் எடுப்பதில் என் ஆர்வம் நீண்டுகொண்டே சென்றது.

தங்களைப் பற்றிய குறிப்பு பள்ளி பாடப்புத்தகத்தில் இடம்பெற்றுள்ளது பற்றி?

இந்த வருடம் தமிழ்நாடு பத்தாம் வகுப்பு அறிவியல் பாடப்புத்தகத்தில் என்னைப் பற்றிய குறிப்பு இடம்பெற்றிருப்பது மிகவும் மகிழ்ச்சியாகவும் ,பெருமையாகவும் உள்ளது .நிறைய சர்வதேச பத்திரிக்கைகளில் என்னைஒ பற்றி கட்டுரைகள் வெளிவந்து இருந்தாலும் இந்த செய்தி எனக்கு ஒரு தனி அங்கீகாரத்தை அளித்திருக்கிறது .இதற்கு நான் மிகவும் கடமைப்பட்டுள்ளேன்.

பெண் வனஉயிர் புகைப்படக் கலைஞருக்கு வீட்டில் கிடைத்த ஆதரவு என்ன?

அப்பா ராணுவத்தில் இருந்தவர். அம்மா பள்ளி ஆசிரியர். அப்பா ராணுவத்தில் இருந்ததால் என்னவோ அவரின் வளர்ப்பு, தைரியம் ,விசாலமான பார்வையுடன் யோசிக்கும் திறன் எனக்குள் இருந்தது.

பெண்கள் பொறியியல் படிக்க நினைத்துக்கூட பார்க்க முடியாத அந்தக் காலத்தில் பொறியியல் படிக்க ஆசைப்பட்டு வீட்டில் கேட்டபொழுது மறுப்பேதும் சொல்லாமல் படிக்க அனுப்பினார்கள்.

மேற்கொண்டு புகைப்படக் கலைஞர் ஆக வேண்டும் என்ற விருப்பத்தை தெரிவித்தபோதும் மறுப்பேதும் சொல்லாமல் அனுப்பிவைத்தனர். அப்பா, அம்மா இருவரும் தற்போது இல்லையென்றாலும் அவர்களின் வழிகாட்டுதல் படியே நடக்கிறேன். அவர்களுக்கு அடுத்து
தற்போது என் கணவர் எனக்கு உறுதுணையாக உள்ளார். வீட்டில் உள்ளவர்கள் ஆதரவு இருப்பதானால்தான் என்னால் இவ்வளவு தூரம் வர முடிந்தது.

வனஉயிர் புகைப்படக் கலைஞராக வேண்டும் என்று ஆசைப்படுபவர்களுக்கு தங்களின் வழிகாட்டுதல் என்ன?

நிறைய பொறுமையும் , அடிப்படை விசயங்களையும் கற்றுக்கொண்டால் யார் வேண்டுமானாலும் வனஉயிர் புகைப்படக் கலைஞர் ஆகலாம் .கேமராக்கள் ,கேமரா லென்ஸ் போன்றவைகளை வாடகைக்கு எடுத்துக்கொள்ளலாம். ஆனால் வனஉயிர் புகைப்படக் கலைஞர் ஆவதற்கு அடிப்படை விஷயங்களை கற்றுக்கொள்ள வேண்டும்.

காட்டில் உள்ள விலங்குகள் தங்களை போட்டோ எடுக்க அழைக்கவில்லை. நாம்தான் அவற்றை படம் எடுக்கின்றோம். அதனால் வன உயிரினங்களை எந்தக் காரணம் கொண்டும் தொந்தரவு செய்யக் கூடாது. இதுவே வருங்கால புகைப்படக் கலைஞர்களுக்கு என்னுடைய அறிவுரை.

வனஉயிர்கள் பற்றியும், காடுகள் பற்றியும் உங்களின் பார்வை

இந்தத் துறையில் நான் நிறைய கற்றுக்கொண்டேன். வனஉயிர்களின் வாழ்வியலும், அதன் பங்கும் , காடுகள் இன்றிமையாதவை. மனிதர்களாகிய நாம் நம் தேவைகளுக்காக மரத்தை வெட்டுகிறோம்.

ஆனால் மேற்கொண்டு மரங்களை நடுவதில்லை. இப்படி இருந்தால் நாட்டில் மழை எப்படி வரும். இயற்கையிடம் இருந்து எந்த அளவு நாம் எடுகின்றோமோ அந்த அளவுக்கு திருப்பித்தர வேண்டும்.