சென்னை : அமைச்சர் செந்தில் பாலாஜியின் ஜாமீன் மனுவை சிறப்பு நீதிமன்றமே விசாரிக்கும் என சென்னை முதன்மை அமர்வு நீதிமன்ற நீதிபதி அல்லி உத்தரவிட்டு உள்ளார். சட்டவிரோத பணபரிமாற்ற தடைச் சட்ட வழக்கில் கடந்த ஜூன் 14 ஆம் தேதி அமலாக்கத் துறையால் அமைச்சர் செந்தில் பாலாஜி கைது செய்யப்பட்டார்.
அமலாக்கத்துறை கைதை எதிர்த்து தொடரப்பட்ட வழக்கில் சென்னை உயர் நீதிமன்றத்தில் தீர்வு காணமுடியாத சூழல் ஏற்பட்ட நிலையில், உச்ச நீதிமன்றத்தில் முறையிடப்பட்டது. இந்நிலையில் அமைச்சர் செந்தில் பாலாஜியை, அமலாக்கத்துறை கைது செய்தது சரி என உச்ச நீதிமன்றம் தீர்ப்பளித்த பிறகு, ஐந்து நாட்கள் அமலாக்கத்துறை காவலில் அமைச்சர் செந்தில் பாலாஜி விசாரிக்கப்பட்டார்.
அதன்பின், 5 நாட்கள் அமலாக்கத்துறை விசாரணைக்கு பின் சென்னை முதன்மை அமர்வு நீதிமன்றத்தில் ஆகஸ்ட் 12ஆம் தேதி ஆஜர்படுத்தபட்ட போது, ஆகஸ்ட் 25ஆம் தேதி வரை நீதிமன்ற காவல் நீட்டிக்கப்பட்டது. அன்றைய தினமே, செந்தில் பாலாஜி மீது 120 பக்கங்களுக்கும் மேற்பட்ட குற்றபத்திரிகையும், 3 ஆயிரம் பக்கங்களை கொண்ட ஆவணங்களையும் டிரங்கு பெட்டியில் வைத்து அமலாக்கத் துறை நீதிமன்றத்தில் தாக்கல் செய்தது.
இந்த நிலையில், அமைச்சர் செந்தில் பாலாஜிக்கு எதிராக அமலாக்கத் துறை தாக்கல் செய்த வழக்கு, சென்னை மாவட்ட ஆட்சியர் அலுவலகத்தில் உள்ள எம்.பி., எம்.எல்.ஏ.க்கள் மீதான வழக்குகளை விசாரிக்கும் சிறப்பு நீதிமன்றத்திற்கு ஆகஸ்ட் 17ஆம் தேதி மாற்றப்பட்டது. சிறப்பு நீதிமன்ற நீதிபதி ரவி முன்பு கடந்த ஆகஸ்ட் 28 ஆம் தேதி வழக்கு விசாரணைக்கு வந்தபோது, நேரில் ஆஜரான செந்தில் பாலாஜிக்கு குற்றப்பத்திரிக்கை நகல் வழங்கப்பட்டது.
அப்போது செந்தில் பாலாஜி தரப்பில், குற்றப்பத்திரிக்கை தாக்கல் செய்யப்பட்டதால், கடந்த 2 மாதங்களாக நீதிமன்ற காவலில் இருப்பதாக கூறி ஜாமீன் மனுவை விசாரணைக்கு ஏற்க வேண்டும் என கோரிக்கை வைக்கப்பட்டது. அதை ஏற்க மறுத்த நீதிபதி, ஜாமீன் கோரி சென்னை முதன்மை அமர்வு நீதிமன்றத்தில் வழக்கு தொடர செந்தில் பாலாஜிக்கு அறிவுறுத்தினார்.
சிறப்பு நீதிமன்றத்தின் அறிவுறுத்தலின் படி, அமைச்சர் செந்தில் பாலாஜி தரப்பில் சென்னை முதன்மை அமர்வு நீதிமன்றத்தில் நேற்று (ஆகஸ்ட். 29) ஜாமீன் மனுத் தாக்கல் செய்யப்பட்டது. இந்த மனுவை விசாரணைக்கு எடுத்துக் கொண்ட சென்னை முதன்மை அமர்வு நீதிமன்ற நீதிபதி அல்லி, எம்.பி., எம்.எல்.ஏக்கள் மீதான வழக்குகளை விசாரிக்கும் சிறப்பு நீதிமன்றமே ஜாமீன் மனுவை விசாரிக்கலாம் எனக் கூறி வழக்கை முடித்து வைத்தார்.
இதையும் படிங்க :Senthil Balaji : ஜாமீன் கோரி அமைச்சர் செந்தில் பாலாஜி மனுத் தாக்கல்!
