காவலர் பணிகளுக்கான தேர்வு: சீருடை பணியாளர் தேர்வாணையம் அறிவிப்பு

சென்னை: தமிழ்நாட்டில் காலியாக உள்ள 10 ஆயிரத்து 906 காவலர் பணியிடங்களுக்கான தேர்வு நடக்க உள்ளதாக சீருடை பணியாளர் தேர்வாணையம் அறிவித்துள்ளது.

தமிழ்நாட்டில் காவல்துறையில் ஓய்வு உள்ளிட்ட பல்வேறு காரணங்களால் காலியாகும் பணியிடங்களுக்காக சீருடைப் பணியாளர் தேர்வாணையம் மூலம் இரண்டாம் நிலைக் காவலர்கள் தேர்வு செய்யப்படுகின்றனர். ஆயுதப்படை, சிறப்புக் காவல்படை, சிறைத்துறை, தீயணைப்புத் துறைக்கு என தனித்தனியாக தேர்வு செய்யப்படுவர். இது குறித்த அரிவிப்பு தற்போது வெளியாகியுள்ளது.

மாநிலத்தில் காலியாக உள்ள 10 ஆயிரத்து 906 காவலர் பணியிடங்களுக்கு ஆன்லைனில் விண்ணப்பிக்கலாம் என அறிவிக்கப்பட்டுள்ளது. அதன்படி www.tnusrbonline.org என்ற இணையதளத்தில் செப்டம்பர் 26ஆம் தேதி முதல் விண்ணப்பிக்கலாம். அக்டோபர் 26 கடைசி தேதி என அறிவிக்கப்பட்டுள்ளது.
டிசம்பர் 13ஆம் தேதி எழுத்துத்தேர்வு நடக்கும். இந்த எழுத்துத்தேர்வு மாவட்டவாரியாக நடக்கும்.

அதன் பின்னர், அதில் தேர்ச்சி பெற்றவர்களுக்கான உடல் தகுதித்தேர்வு, நேர்முகத்தேர்வு நடத்தப்பட்டு, தேர்வு செய்யப்படுவார்கள். ஆயுதப்படை இரண்டாம் நிலைக் காவலர் பதவிக்கு 3 ஆயிரத்து 784 பேர் தேர்வு செய்யப்பட உள்ளனர். இதில் ஆண்கள் 685 பேர், பெண்கள் 3 ஆயிரத்து 99 பேர் தேர்வு செய்யப்படுவர். ஆண், பெண், மூன்றாம் பாலினத்தவர் உள்ளிட்ட பிரிவினருக்குத் தேர்வு நடைபெறும்.

தமிழ்நாடு சிறப்புக் காவல் படையில் இரண்டாம் நிலைக் காவலர் பதவிக்கும் இதேபோன்று 6 ஆயிரத்து 545 பேர் தேர்வு செய்யப்பட உள்ளனர். இதில் ஆண்கள் மட்டும் தேர்வு செய்யப்பட உள்ளனர்.