கரோனா வைரஸ் தாக்குதல் குறித்து நாம் தமிழர் கட்சியின் தலைமை ஒருங்கிணைப்பாளர் சீமான் காணொலியை வெளியிட்டுள்ளார். அதில் அவர், “உலகமெங்கும் கரோனோ என்கிற இந்த நோய்த்தொற்றால் பேரச்சம் பரவியிருக்கிறது. உலகமே ஒடுங்கி, உறைந்து கிடக்கிறது. இந்தச் சூழலில் நாம் மிகுந்த எச்சரிக்கை உணர்வோடு இதை எதிர்கொள்ள வேண்டிய தேவை உருவாகியுள்ளது.
மருத்துவர்களின் அறிவுறுத்தலின்படி நம்முடைய கைகளை அடிக்கடி கழுவி தூய்மைப்படுத்திக் கொள்ள வேண்டும். வெளியில் செல்லும்போது முகக்கவசம் அணிதல், கைக் கொடுப்பதைத் தவிர்த்தல் என நாம் பாதுகாப்பாக இருக்க வேண்டிய தேவை உள்ளது.
கரோனா வைரஸ் எதிர்கொள்கிற நாம் ஒவ்வொருவரும் போராளிதான் என்றாலும் களத்தில் நின்று தீவிரமாகப் பணியாற்றிக்கொண்டிருக்கிற மருத்துவர்கள், செவிலியர், காவல் துறையினர், தூய்மைக் காவலர்கள், அவசர ஊர்தி ஓட்டுநர்கள், காய்கறி, பால் உள்ளிட்ட அத்தியாவசியப் பொருள்களைத் தந்து கொண்டிருப்பவர்கள்தான் களத்தில் முன்னணியில் நின்றுப் போராடும் போராளிகள்.