கரோனா தடுப்பு குறித்து ஆலோசனை நடத்திய சத்யபிரதா சாகு!

சென்னை: கரோனா காலத்தில் தேர்தல் நடத்தப்படுவதால் வேட்புமனு தாக்கல், வாக்குச்சாவடி, பொதுக்கூட்டங்கள் போன்ற இடங்களில் பின்பற்றவேண்டிய கரோனா தடுப்பு நடவடிக்கைகள் குறித்து தேர்தல் அலுவலர்களுடன் மாநில தலைமை தேர்தல் அலுவலர் சத்யபிரதா சாகு ஆலோசனை நடத்தினார்.

தமிழ்நாட்டில் தேர்தல் தேதி அறிவிக்கப்பட்டு, கடந்த வாரத்திலிருந்து தேர்தல் நடத்தை விதிகள் அமலுக்கு வந்துள்ளது. கட்சிகள் விருப்ப மனுக்கள் பெற்று வரும் சூழலில், வரும் 12ஆம் தேதி முதல் வேட்புமனு தாக்கல் தொடங்கவுள்ளது. சுமார் 88 ஆயிரம் வாக்குச்சாவடிகள் அமைக்கப்பட்டுள்ளன.

கரோனா பரவல் காலத்தில் தமிழ்நாடு சட்டப்பேரவை தேர்தல் நடைபெறவிருப்பதால் வாக்குச்சாவடிகள், தேர்தல் பரப்புரை நடக்கும் இடங்கள், வேட்புமனு தாக்கல் செய்யும் இடங்களில் எடுக்க வேண்டிய கரோனா தடுப்பு நடவடிக்கைகள் குறித்து தலைமை தேர்தல் அலுவலர் சத்யபிரதா சாகு ஆலோசனை மேற்கொண்டார்.

சென்னை தலைமைச் செயலகத்தில் காணொலி காட்சி வாயிலாக நடைபெற்ற இந்த ஆலோசனைக் கூட்டத்தில், தமிழ்நாடு சுகாதாரத் துறை செயலாளர் மருத்துவர் ராதாகிருஷ்ணன், பொது சுகாதாரத் துறை இயக்குநர், சுகாதாரத் துறை அலுவலர்கள், அனைத்து மாவட்ட தேர்தல் அலுவலர்கள் உள்ளிட்டோர் கலந்து கொண்டனர்.

இதையும் படிங்க: மக்கள் நீதி மய்யம் தலைமையில் அமைகிறதா 3ஆவது அணி?