பள்ளிகள் திறக்கும் தேதியை தள்ளிவைக்க கோரிக்கை - ஜாக்டோ- ஜியோ அமைப்பு

சென்னை : கோடை வெயிலின் தாக்கம் அதிகரித்துள்ள நிலையில் மாணவர்களின் நலனை கருத்தில் கொண்டு பள்ளி திறக்கும் தேதியை தள்ளிவைக்க ஜாக்டோ- ஜியோ அமைப்பு கோரிக்கை விடுத்துள்ளது.

சென்னையில் ஜாக்டோ- ஜியோ அமைப்பு ஒருங்கிணைப்பு கூட்டம் நடைபெற்றது. இந்தக் கூட்டத்திற்குப் பின்னர் அதன் ஒருங்கிணைப்பாளர்கள் தாஸ், அன்பரசு ஆகியோர் செய்தியாளர்களை சந்திக்கையில், 'மக்களவை, சட்டப்பேரவை தேர்தலில் வெற்றிப் பெற்றவர்களுக்கு எங்களது அமைப்பு சார்பாக வாழ்த்துகளை தெரிவித்துக் கொள்கிறோம். அதேபோல் தேர்தலில் ஜனநாயகக் கடமையை முழுமையாக ஆற்றிய அரசு அலுவலர்கள், ஆசிரியர்களுக்கு வாழ்த்துகளை தெரிவித்துக் கொள்கிறோம்.

ஜாக்டோ- ஜியோ அமைப்பினர் பல்வேறு கோரிக்களை வலியுறுத்தி போராட்டம் நடத்தினோம். இந்தப் போராட்டத்தில் ஈடுபட்ட எட்டாயிரம் ஆசிரியர்கள், அரசு ஊழியர்கள் மீது வழக்குகள் போடப்பட்டு, ஒழுங்கு நடவடிக்கை எடுக்கப்பட்டுள்ளது. இந்த வழக்குகளினால் அவர்கள் பணப்பயன், பதவி உயர்வு, பணிமாறுதல் போன்ற சலுகைகள் பெறுவதில் சிக்கல் உள்ளது.

எனவே அவர்கள் மீது போடப்பட்டுள்ள வழக்குகளை திரும்பப் பெற தமிழ்நாடு முதலமைச்சர் நடவடிக்கை எடுக்க வேண்டும். இதை வலியுறுத்தும் விதமாக ஜாக்டோ - ஜியோ அமைப்பு சார்பில் வருகின்ற 10ஆம் தேதி தமிழ்நாடு முதலமைச்சர், அமைச்சர்களை சந்தித்து எங்களது கோரிக்கை மனு அளிக்க உள்ளோம்.

மேலும் தற்போது கோடைவெயிலின் தாக்கம் அதிகரித்துள்ளதால், மாணவர்களின் நலனை கருத்தில் கொண்டு பள்ளி திறக்கும் தேதியை ஒருவார காலம் தள்ளிவைக்க வேண்டும்' என்றனர்.