சென்னை:இயக்குநர் சங்கர் இயக்கத்தில் கமல்ஹாசன் நடிப்பில் உருவாகி உள்ள இந்தியன் 2 திரைப்படத்தின் முன்னோட்ட வீடியோவை தமிழில் நடிகர் ராஜினிகாந்தும், தெலுங்கில் இயக்குநர் ராஜமெளலி, மற்றும் மலையாளத்தில் நடிகர் மோகன்லால் ஆகியோர் வெளியிட உள்ளதாக அறிவிப்பு வெளியாகி உள்ளது.
நடிகர் கமல்ஹாசன், இரண்டு வேடங்களில் நடித்து 1996ஆம் ஆண்டு வெளியான திரைப்படம் இந்தியன். இயக்குநர் சங்கர் இயக்கத்தில் ஏ.ஆர். ரகுமான் இசையில் உருவான இப்படத்தில் சுகன்யா, மனிஷா கொய்ராலா, கவுண்டமனி, செந்தில், உள்ளிட்ட பல முன்னணி நட்சத்திரங்கள் நடித்து இருந்தனர்.
ஊழல், லஞ்ச ஒழிப்பு உள்ளிட்ட கருத்துகளை மையமாக வைத்து எடுக்கபட்ட இத்திரைப்படம் ரசிகர்கள் மத்தியில் நல்ல வரவேற்பை பெற்றது. 1996 ஆம் ஆண்டிற்கான ஆஸ்கார் பரிந்துரைக்கு இந்தியாவின் சார்பில் இத்திரைப்படம் தேர்ந்தெடுக்கப்பட்டது குறிப்பிடதக்கது.
இதனையடுத்து 27 ஆண்டுகளுக்கு பிறகு சங்கர் இயக்கத்தில் இந்தியன் 2 படத்தின் இறுதிகட்ட படப்பிடிப்பு விறுவிறுப்பாக நடைபெற்று வருகிறது. லைகா நிறுவனம் தயாரித்து வரும் இப்படத்தில் எஸ்.ஜே.சூர்யா, காஜல் அகர்வால், சித்தார்த், பிரியா பவானி சங்கர், உள்ளிட்ட பல முன்னணி நட்சத்திரங்கள் நடித்து உள்ளனர். மேலும் அனிருத் இந்த படத்திற்கு இசையமைத்து உள்ளார்.