போதையில் பெண்களிடம் வரம்புமீறிய வழக்கறிஞர்கள் கைது! - காப்பானாக வந்த 'காவலன்'

சென்னை: பேருந்தில் சென்ற பெண்களிடம் போதையில் வரம்புமீறிய வழக்கறிஞர்கள் கைது செய்யப்பட்டனர்.

சென்னை பிராட்வேயிலிருந்து கோயம்பேடு வரை செல்லும் 15ஜி பேருந்து சென்னை ராஜிவ் காந்தி மருத்துவமனை பேருந்து நிறுத்தம் அருகே சென்றபோது அங்கு பெண்களிடம் குடிபோதையில் வழக்கறிஞர்கள் சிலர் வரம்புமீறியுள்ளனர்.

இதுதொடர்பாக அந்தப் பெண்கள் உடனே காவலன் செயலி மூலம் காவல் துறையினருக்குப் புகார் அளித்தனர். இதன் அடிப்படையில் சம்பவ இடத்திற்கு விரைந்துவந்த ரோந்துப் பணியிலிருந்த காவலர்கள் வரம்புமீறிய வழக்கறிஞர்கள் மூவரை கைது செய்தனர்.

பின்னர் அவர்களிடம் நடத்திய விசாரணையில் அம்பேத்கர் சட்டக்கல்லூரியில் இறுதி ஆண்டு முடித்த மாணவர்களான அருள் குமார் (23), ஆனந்த ராஜ் (21), பொன்மணி மாறன் (24) என்பது தெரியவந்தது.

மேலும் இவர்கள் பார் கவுன்சிலில் வழக்கறிஞர்களாகத் தங்களது பெயர்களைப் பதிவு செய்துவிட்டு மதுபோதையில் ரகளையில் ஈடுபட்டதும் தெரியவந்தது. பின்னர் இவர்களை பூக்கடை காவல் துறையினர் நீதிமன்றத்தில் ஆஜர்படுத்தி புழல் சிறையில் அடைத்தனர்.