இயக்குநராக அறிமுகமாகும் பா. ரஞ்சித்தின் இணை இயக்குநர்

சூப்பர்ஸ்டார் ரஜினிகாந்த் நடித்த கபாலி, காலா போன்ற படங்களில் இணை இயக்குநராக பணிபுரிந்த தினகரன் சிவலிங்கம், இயக்குநர் பா. ரஞ்சித் தயாரிப்பில் நகைச்சுவை கலந்த உணர்வுப்பூர்வமான படம் மூலம் இயக்குநராக அறிமுகமாகவுள்ளார்.

சென்னை: உதவி இயக்குநராக தன்னிடம் பணிபுரிந்த தினகரன் சிவலிங்கத்தை, புதிய படம் மூலம் இயக்குநராக அறிமுகபடுத்துகிறார் இயக்குநர் பா. ரஞ்சித்.

இந்தப் படம் தமிழ்நாட்டில் தற்போதைய சூழலில் இருக்கும் முக்கிய பிரச்னையை மையமாகக்கொண்டு நகைச்சுவையோடு உணர்வுப்பூர்வமான கதையம்சத்துடன் உருவாக்கப்பட உள்ளதாகக் கூறப்படுகிறது. படத்தை பா. ரஞ்சித்துடன் இணைந்து, பலூன் திரைப்படத்தை தயாரித்த, பலூன் பிக்சர்ஸ் டி. என் அருண்பாலாஜி தயாரிக்கவுள்ளார்.

படத்தில் பணியாற்றவுள்ள தொழில்நுட்ப கலைஞர்கள் மற்றும் நடிகர், நடிகைகள் பற்றிய அறிவிப்பு விரைவில் வெளியிடப்படும் எனத் தெரிவிக்கப்பட்டுள்ளது.

நீலம் புரொடக்சன்ஸ் தயாரிப்பில் வெளியாகும் படங்களுக்கு மக்கள் மத்தியில் பெரும் எதிர்பார்ப்பு உள்ள நிலையில் , சமீபத்தில் வெளிவந்த 'சார்பட்டா பரம்பரை' பெரும் வரவேற்பையும், வசூலையும் பெற்றுத்தந்தது.

அந்த வகையில் தற்போது முழுக்க முழுக்க நகைச்சுவையையும், உணர்வுப்பூர்வமான வாழ்வையும் மையப்படுத்தி தயாராகும் இந்தப் படம் மீதும் எதிர்பார்ப்பு ஏற்பட்டுள்ளது.