சென்னை புழல் பகுதியைச் சேர்ந்தவர் கதிரவன்(35). இவர் சென்னை அண்ணா நகர் மேற்கு தனியார் நிறுவனத்தில் பணிபுரிந்து வருகிறார். இவர் நேற்று மதியம் 1:30 மணியளவில் அண்ணா நகரில் உள்ள எஸ்.பி.ஐ வங்கிக்குச் சென்று காசோலை மூலம் ரூபாய் ஒரு லட்சம் பணத்தை எடுத்துக்கொண்டு தன்னுடைய இருசக்கர வாகன பின் சீட்டில் வைத்து லாக் செய்துள்ளார்.
பின்பு, 2ஆவது அவென்யூவில் உள்ள பிரிமாஸ் பேக்கரி முன்பு தனது இருசக்கர வாகனத்தை நிறுத்திவிட்டு அருகில் இருந்த சூப்பர் மார்கெட் சென்றுள்ளார். பின்பு, திரும்பி வந்து கதிரவன் தன்னுடைய இரு சக்கர வாகனத்தை பார்த்தபோது பின் சீட்டு லாக்கரை உடைத்து ரூபாய் ஒரு லட்சம் பணத்தை யாரோ கொள்ளையடித்திருப்பதைக் கண்டு அதிர்ச்சியடைந்தார்.
இதுகுறித்து திருமங்கலம் காவல் நிலையத்தில் அவர் புகார் அளித்ததைத் தொடர்ந்து, காவல்துறையினர் வழக்குப் பதிவு செய்து குற்றவாளியை தேடிவருகின்றனர்.