மோட்டார் வாகன திருத்தச் சட்டம் இன்று முதல் அமல் - அதிகரித்தது அபராத தொகை..

மோட்டார் வாகன திருத்தச் சட்டத்தின் அடிப்படையில் போக்குவரத்து விதி மீறலில் ஈடுபடும் வாகன ஓட்டிகளுக்கு புதிய அபராதங்கள் விதிக்கும் நடைமுறை இன்று(அக்.26) முதல் அமல்படுத்தப்பட்டுள்ளது.

சென்னை:கடந்த 2019 ஆம் ஆண்டு மோட்டார் வாகன திருத்தச் சட்டம் மத்திய அரசால் கொண்டுவரப்பட்டது. தமிழ்நாடு அரசு கடந்த 19ஆம் தேதி இது தொடர்பாக அரசாணை வெளியிட்டது. இந்நிலையில் புதிய அபராத தொகை விதிக்கும் நடைமுறை இன்று(அக்.26) முதல் அமல்படுத்தப்பட்டுள்ளது.

சென்னையில் உள்ள 300க்கும் மேற்பட்ட அபராதம் விதிக்க பயன்படுத்தப்படும் இயந்திரங்களில், 100 இயந்திரங்கள் அப்டேட் செய்யப்பட்டு, காவலர்கள் விதிமீறிய வாகன ஓட்டிகளுக்கு புதிய அபராதங்களை விதித்தனர்.

அதன்படி தாசபிரகாஷ் சிக்னல் பகுதியில் போக்குவரத்து காவலர்கள் அபராதம் விதித்தனர். குறிப்பாக இரு சக்கர வாகனத்தில் ஹெல்மெட் அணியாமல் வந்தவருக்கு ரூ.1000, சீட் பெல்ட் அணியாதவருக்கு ரூ.1000 அபராதம் விதித்தனர். இதற்கான சலான் வாகன ஓட்டிகளிடம் வழங்கப்பட்டது.

இது குறித்து செய்தியாளர்களிடம் பேசிய ஆய்வாளர் பாண்டிவேலு,’’அனைத்து போக்குவரத்து ஜங்ஷன்களிலும் அந்தந்த பகுதிகளில் இருக்கக்கூடிய ஆய்வாளர் தலைமையில் உள்ள போலீசார் இருசக்கர வாகனம் மற்றும் நான்கு சக்கர வாகனங்களை முறையாக ஹெல்மெட் அணிகிறார்களா? அதேபோன்று சீட் பெல்ட் அணிந்துள்ளார்களா? என்பதைக் கண்காணித்து அவர்களுக்கு அபராதம் விதிக்கப்பட்டு வருகிறது.

எடுத்தவுடன் சென்னை காவல்துறை இதுபோன்ற அபராதத்தை விதிக்கவில்லை. ஏற்கனவே போக்குவரத்து காவல்துறை மூலமாக விழிப்புணர்வுகள் ஏற்படுத்தப்பட்டிருக்கிறது. அதை மீறி செயல்படுபவர்கள் மீது தான் அபராதம் தொகை விதிக்கப்படுகிறது.

அபராதம் விதிப்பது மட்டுமே எங்களுடைய முக்கிய நோக்கம் அல்ல. விபத்துகளைத் தவிர்க்கவும் உயிரிழப்புகள் ஏற்படாமல் தடுப்பது தான் காவல்துறையின் பணி. ஏற்கனவே மது அருந்திவிட்டு வாகனம் ஓட்டுபவர்களுக்குப் பத்தாயிரம் ரூபாய் அபராதம் விதிக்கப்பட்டு வருகிறது. ஆனால் தற்பொழுது அந்த நபருடன் உடன் வருபவர்களுக்கும் அதே அபராத தொகை விதிக்கப்பட்டுள்ளது.

ஹெல்மெட் மற்றும் சீட் பெல்ட் இல்லாமல் பயணித்தால் ரூ.1000 புதிய அபராத தொகை விதிக்கப்பட்டுள்ளது. காவல்துறை உங்களுக்கு நண்பர்களாகத் தான் செயல்படுகிறது. ஆகவே பொதுமக்களும், காவல்துறைக்கு ஒத்துழைப்பு வழங்குமாறு கேட்டுக்கொள்வதாகக் காவல் ஆய்வாளர் தெரிவித்துள்ளார்.

இதையும் படிங்க:இந்தி படித்தால் வாய் பேச முடியாத அடிமைகளாக செல்ல நேரிடும் - கவிஞர் வைரமுத்து