பருவமழையை எதிர்கொள்ள முன்னெச்சரிக்கை நடவடிக்கை ஆலோசனை

எதிர்வரும் வடகிழக்குப் பருவமழையை எதிர்கொள்ளும் வகையில் ஊரக வளர்ச்சித் துறையினால் எடுக்கப்பட வேண்டிய முன்னெச்சரிக்கை நடவடிக்கைகள் குறித்து அமைச்சர் பெரியகருப்பன் ஆலோசனை நடத்தினார்.

சென்னை:கே.ஆர். பெரியகருப்பன், ஊரக வளர்ச்சித் துறையின் பணிகள் மேம்பாடு குறித்து ஊரக வளர்ச்சி மற்றும் ஊராட்சி இயக்குநரகத்தில் நேற்று (அக்டோபர் 18) ஆய்வுக்கூட்டம் நடத்தினார்.

இக்கூட்டத்தில் அரசினால் வெளியிடப்பட்டுள்ள பல்வேறு ஊரக வளர்ச்சித் துறை அறிவிப்புகளைச் செயல்படுத்துதல், அதன் தற்போதைய நிலை, பணிகளின் முன்னேற்றம், நிதிநிலை குறித்து ஆய்வினை மேற்கொண்டார்.

வளர்ச்சித் திட்டங்கள்

இதனைத் தொடர்ந்து எதிர்வரும் வடகிழக்குப் பருவமழையை எதிர்கொள்ளும் வகையில் ஊரக வளர்ச்சித் துறையினால் எடுக்கப்பட்ட, எடுக்கப்பட வேண்டிய முன்னெச்சரிக்கை நடவடிக்கைகள், மகாத்மா காந்தி தேசிய ஊரக வேலை உறுதித் திட்டத்தின்கீழ் எடுக்கப்பட்ட பணிகள், முன்னேற்ற நிலை குறித்து ஆய்வுசெய்தார்.

மேலும் அரசின் வீடுகள் வழங்கும் திட்டத்தின் பயனாளிகள் தேர்வு, வீடு கட்டும் திட்டப் பணிகளின் முன்னேற்றம் - விரைந்து முடிப்பதற்கான வழிமுறைகள், சமத்துவபுரம் பணிகள், ஊரக சாலைகள் மேம்பாடு, ஜல்ஜீவன் திட்டத்தில் குடிநீர் இணைப்பு வழங்குவதில் முன்னேற்ற விவரம், தூய்மை பாரத இயக்கப் பணிகள் போன்றவற்றை ஆய்வுசெய்தார்.

முதலமைச்சர் அறிவுறுத்தல்

இதையடுத்து இக்கூட்டத்தில், தேசிய அளவில் திட்டங்களைச் சிறப்பாகச் செயல்படுத்துவதில் தமிழ்நாடு எப்போதும் முதன்மை மாநிலமாகத் திகழும் வகையில் பணிகளை குறித்த காலத்தில் முடித்து சிறப்பான சேவையினை வழங்குவதில் துறை அலுவலர்கள் திட்டமிட்டு சிறப்புடன் செயல்பட அமைச்சர் கேட்டுக்கொண்டார்.

தமிழ்நாடு முதல்லமைச்சர் சிறப்பான வழிகாட்டுதலின்படி ஊரக வளர்ச்சித் துறை சார்ந்த அனைத்து அறிவிப்புகளையும் உடனடியாக முழுவீச்சில் செயல்படுத்தி உரிய நடவடிக்கைகள் மேற்கொள்ள அறிவுறுத்தினார்.

இக்கூட்டத்தில் ஊரக வளர்ச்சி மற்றும் ஊராட்சித் துறை இயக்குநர் பிரவீன் பி. நாயர், ஊரக வளர்ச்சி மற்றும் ஊராட்சித் துறையின் கூடுதல் இயக்குநர்கள், முதன்மைப் பொறியாளர்களும் கலந்துகொண்டனர்.