பேருந்து நிறுத்தத்தில் மாணவன் தாலி கட்டிய விவகாரம்; காவல்துறை மீது நீதிமன்றம் அதிருப்தி

சிதம்பரம் பேருந்து நிறுத்தத்தில் மாணவன் தாலி கட்டிய விவகாரத்தில் குழந்தைகள் நலக்குழுவினர் மற்றும் காவல்துறை சென்னை உயர் நீதிமன்றம் அதிருப்தி தெரிவித்துள்ளது.

கடலூர்: சிதம்பரத்தில் 16 வயது மாணவிக்கு, சக மாணவர் ஒருவர் மஞ்சள் கயிற்றை கட்டுவது போன்ற காட்சிகள், சமூக வலைதளத்தில் பரவியது. கடந்த செப்டம்பர் 2ஆம் தேதி நடந்த இந்த சம்பவம் தொடர்பான வீடியோ பதிவுகள், 12 நாட்களுக்கு பின் சமூக வலைதளத்தில் வெளியானது.

இதையடுத்து அக்டோபர் 10ஆம் தேதி இதுதொடர்பாக அந்த மாணவனுக்கு எதிராக சிதம்பரம் நகர காவல்துறையினர் வழக்குப்பதிவு செய்தனர். அதேபோல, மாவட்ட குழந்தைகள் நலக்குழு, மாணவியின் வீட்டுக்குச் சென்று அவரை அழைத்துக் கொண்டு சென்று அரசு காப்பகத்தில் சேர்த்தது.

தனது மகளை குழந்தைகள் நலக்குழுவினர் எதற்காக அழைத்துச் சென்றனர் எனத் தெரியவில்லை எனக் கூறி, அவரை மீட்டு தங்களிடம் ஒப்படைக்க கோரி மாணவியின் தந்தை சென்னை உயர் நீதிமன்றத்தில் ஆட்கொணர்வு மனுவை தாக்கல் செய்தார்.

இந்த மனுவை விசாரித்த நீதிபதிகள் பி.என் பிரகாஷ் மற்றும் டீக்காராமன் அமர்வு, மாணவியை சட்டவிரோத காவலில் வைத்திருப்பதாக கூறி அவரை உடனடியாக விடுவித்து பெற்றோரிடம் ஒப்படைக்க உத்தரவிட்டனர். இதையடுத்து, மாணவியை விடுவித்து தாயிடம் ஒப்படைத்து விட்டதாக மாவட்ட குழந்தைகள் நலக்குழு தரப்பில் தெரிவிக்கப்பட்டது.

இருப்பினும், முழுமையாக விசாரணை நடத்தாமல் அவசர கதியில் மாணவியை அரசு காப்பகத்தில் தங்க வைத்த குழந்தைகள் நலக்குழு மற்றும், மாணவன் மீது வழக்கு பதிவு செய்த காவல்துறையினர் செயல் குறித்தும் அதிருப்தி தெரிவித்த நீதிபதிகள், மாணவனுக்கு எதிராக பதிவு செய்யப்பட்ட வழக்கில் எடுத்த நடவடிக்கைகள் குறித்து அறிக்கை தாக்கல் செய்ய சிதம்பரம் நகர காவல்துறையினருக்கு உத்தரவிட்டு, விசாரணையை நவம்பர் 10ஆம் தேதிக்கு தள்ளிவைத்தனர்.

இதையும் படிங்க:போலி சாதி சான்றிதழ் தயாரித்த விவகாரம்; 3 டாக்டர்கள் உள்பட 4 பேருக்கு சிறை...