தமிழகத்தில் மார்ச் 10-ல் போலியோ சொட்டு மருந்து முகாம்!

சென்னை: தமிழகம் முழுவதும் மார்ச் 10-ம் தேதி போலியோ சொட்டு மருந்து முகாம் நடைபெறும் என்று பொது சுகாதாரத்துறை அறிவித்துள்ளது.

போலியோவை ஒழிப்பதற்காக 1994-ம் ஆண்டு முதல் ஜனவரி மற்றும் பிப்ரவரி ஆகிய மாதங்களில் இரு தவணையாக 5 வயதிற்குட்பட்ட குழந்தைகளுக்கு போலியோ சொட்டு மருந்து வழங்கப்பட்டு வருகின்றது. போலியோவை முற்றிலும் ஒழிக்கவே இது போன்ற முடிவுகள் எடுக்கப்பட்டது. போலியோவை ஒழிக்க வேண்டும் என்ற நாடுகளின் பட்டியலில் இந்தியாவும் இணைந்துள்ளது.

இந்நிலையில், இந்தாண்டிற்கான சொட்டு மருந்து முகாம் பிப்ரவரி மாதம் நடைபெறும் என்று அறிவித்த நிலையில், சில காரணங்களால் அது ஒத்தி வைக்கப்பட்டது. முதலில் பிப்ரவரி 10-ம் தேதி நடத்த திட்டமிட்டிருந்த நிலையில், தற்போது மார்ச் 10-ம் தேதி நடைபெறும் என்று பொது சுகாதாரத்துறை அறிவித்துள்ளது. தமிழகம் முழுவதும் இத்தேதியில் அனைத்து மாவட்டங்களிலும் சொட்டு மருந்து முகாம் நடைபெறும் என்றும் அறிவிக்கப்பட்டுள்ளது.