சென்னை:கொலை வழக்கில் கைது செய்யப்பட்ட சிவகங்கையைச் சேர்ந்த தினேஷ் என்பவர் கோவை மத்திய சிறையில் அடைக்கப்பட்டு உள்ளார். இது தொடர்பாக தாய் செங்கையம்மாள் சென்னை உயர் நீதிமன்றத்தில் ஆட்கொணர்வு மனுவைத் தாக்கல் செய்து இருந்தார்.
அதில், கோவை சிறையில் கைதிகள் மற்றும் வார்டன்கள் இடையே ஏற்பட்ட மோதல் சம்பவம் குறித்து வெளியான செய்தியைப் பார்த்து தங்கள் வழக்கறிஞர் அப்துல் ரஹ்மானிடம், மகனைச் சந்தித்து வரும்படி கேட்டுக் கொண்டதாகவும், அதன்படி தினேஷை சந்தித்தபோது, தினேஷ் சிறை வார்டன்களால் கடுமையாக தாக்கப்பட்டு பலத்த காயமடைந்த நிலையிலும், முறையான மருத்துவ சிகிச்சை அளிக்கப்படாமல் இருந்ததாக தெரிய வந்துள்ளதாகக் கூறி உள்ளார்.
மேலும், தனது மகன் உள்பட 7 விசாரணைக் கைதிகள் கடுமையாக தாக்கப்பட்டு உள்ளதாகவும், காயமடைந்து உள்ள தனது மகனுக்கு உரிய மருத்துவ சிகிச்சை வழங்கும்படி சிறைத் துறைக்கு உத்தரவிட வேண்டும் என மனுவில் கோரிக்கை விடுத்து இருந்தார்.