சென்னை: இயக்குநர் ராஜூ முருகன் இயக்கத்தில் கார்த்தி நடித்து வெளியாக இருக்கும் திரைப்படம் ஜப்பான். இந்த படத்தை ட்ரீம் வாரியர் பிக்சர்ஸ் நிறுவனம் தயாரிக்கிறது. இந்த படத்தில் கார்த்திக்கு ஜோடியாக அனு இமானுவேல் நடிக்கிறார். இந்த படத்திற்கு ஜி.வி.பிரகாஷ் குமார் இசை அமைத்துள்ளார்.
முன்னதாக, படத்தின் ட்ரெய்லர் வெளியீட்டு விழா கடந்த அக்.28 ஆம் தேதி சென்னையில் உள்ள நேரு உள்விளையாட்டு அரங்கில் நடைபெற்றது. இந்நிகழ்ச்சியில் கார்த்தி, இயக்குநர் ராஜூ முருகன், கே.எஸ்.ரவிக்குமார், பா.ரஞ்சித், தமன்னா, லோகேஷ் கனகராஜ், எச்.வினோத், சுசீந்திரன், முத்தையா, சிறுத்தை சிவா, சத்யராஜ் உள்ளிட்டோர் கலந்து கொண்டனர்.
நடிகர் சூர்யா சிறப்பு விருந்தினராகக் கலந்து கொண்டு, ஜப்பான் படத்தின் ட்ரெய்லரை வெளியிட்டார். ட்ரெய்லர் வெளியாகி ரசிகர்கள் மத்தியில் பெரும் வரவேற்பைப் பெற்ற நிலையில் படம் நாளை (நவ.10) திரையரங்குகளில் வெளியாக உள்ளது.
இந்த படத்தை சட்டவிரோதமாக இணையதளங்கள் மற்றும் கேபிள் டிவிகளில் வெளியிடுவதைத் தடுக்க வேண்டுமென அரசு மற்றும் தனியார் இணையதள சேவை வழங்கும் நிறுவனங்களுக்கு உத்தரவிடக் கோரி படத்தின் தயாரிப்பு நிறுவனம் ட்ரீம் வாரியர்ஸ் தரப்பில் சென்னை உயர்நீதிமன்றத்தில் வழக்கு தொடரப்பட்டது.