தமிழ்நாட்டில் சட்டம் ஒழுங்கு சீர்குலைவு - விழுப்புரம் கொலை சம்பவத்தைக் கண்டித்த ஈபிஎஸ்!

கஞ்சா விற்பனை செய்பவர்களுக்குத் தடையாக இருந்ததாலேயே பெரம்பூரில் அதிமுக பகுதி செயலாளர் வெட்டிப் படுகொலை செய்யப்பட்டுள்ளார் என எதிர்க்கட்சித் தலைவர் எடப்பாடி பழனிசாமி தெரிவித்துள்ளார். மேலும், விழுப்புரத்தில் கடை ஊழியர் கொலை செய்யப்பட்ட விவகாரத்திற்கு எடப்பாடி பழனிசாமி கண்டனம் தெரிவித்துள்ளார்.

சென்னை: 'தமிழ்நாட்டில் சட்டம் ஒழுங்கு அடியோடு சீர்குலைந்து விட்டது, கஞ்சா விற்பனை அனைத்து இடங்களிலும் கிடைக்கிறது. ஆனால், அதனை மறைத்துப் பேசுகிறார்கள். கஞ்சா விற்பனை செய்பவர்களுக்குத் தடையாக இருந்ததாலேயே பெரம்பூரில் அதிமுக பகுதி செயலாளர் வெட்டிப் படுகொலை செய்யப்பட்டுள்ளார்' என எதிர்க்கட்சித் தலைவர் எடப்பாடி பழனிசாமி விமர்சித்துள்ளார்.

சட்டப்பேரவை வளாகத்தில் எடப்பாடி பழனிசாமி செய்தியாளர்களைச் சந்தித்தார். அப்போது பேசிய அவர், “சட்டப்பேரவையில் நிதியமைச்சர் அதிமுக ஆட்சி காலத்தில் 110 விதியின் அறிவிக்கப்பட்ட அறிவிப்புகளின் பட்டியல் குறித்த வெள்ளை அறிக்கையை வெளியிட்டார். 68 விழுக்காடு அறிவிப்புகள் நிறைவேற்றப்பட்டுள்ளது. 29 விழுக்காடு அறிவிப்புகள் நடைபெற்றுக் கொண்டிருக்கிறது. ஆனால், எந்தப் பணிகளும் நடைபெறவில்லை என நிதியமைச்சர் உண்மைக்கு மாறான செய்திகளை வெளியிடுகிறார்.

மாநகராட்சிப் பள்ளி மாணவர்களுக்கு சிற்றுண்டி வழங்கும் திட்டத்தை முதன் முதலில் தொடங்கியது அதிமுக ஆட்சிக் காலத்தில் தான். அட்சயப் பாத்திரம் திட்டத்தின் மூலமாக சென்னை மாநகராட்சி பள்ளியில் இருக்கக்கூடிய மாணவர்களுக்கு சிற்றுண்டி வழங்கப்பட்டது. அந்த திட்டத்தை முதன்முதலாக தொடங்கியது, அதிமுக தான்” என்றார்.

தொடர்ந்து பேசிய அவர், ''சட்டம் ஒழுங்கு அடியோடு சீர்குலைந்து விட்டது. விழுப்புரத்தில் கடை ஊழியர் கொலை செய்யப்பட்டிருக்கிறார். கஞ்சா விற்பனை அனைத்து இடங்களிலும் கிடைக்கிறது. ஆனால், அதனை மறைத்துப் பேசுகிறார்கள். கஞ்சா விற்பனை செய்பவர்களுக்குத் தடையாக இருந்ததாலேயே பெரம்பூரில் அதிமுக பகுதி செயலாளர் வெட்டிப் படுகொலை செய்யப்பட்டுள்ளார்.

தமிழ்நாட்டில் எது கிடைக்கிறதோ இல்லையோ, கஞ்சா தாராளமாக புழக்கத்தில் உள்ளது. இது மக்களிடையே பதற்றத்தை நாளுக்கு நாள் அதிகரித்து வருகிறது. அதிமுக ஆட்சிக் காலத்தில் அம்மா உணவகங்களில் மக்களுக்கு உணவு ருசியாக வழங்கப்பட்டது. தற்போது அம்மா உணவகத்திற்கு வழங்கப்படும் பொருட்களை குறைத்ததால் தரம் இல்லாத உணவாக அது மாறியுள்ளது.

இதில் என்ன ஆதாரம் ஆட்சியாளர்களுக்கு வழங்க வேண்டும் என்று தெரியவில்லை, ஆட்சியாளர்கள் அம்மா உணவகங்களை ஆய்வு செய்து தவறு இருக்கும் இடங்களை சீர் செய்யுங்கள் என்று அதிமுக சார்பில் கோரிக்கை வைக்கிறோம்” எனத் தெரிவித்தார். ஆவின் தயிர் பாக்கெட்டுகளில் ஹிந்தியில் அச்சிட வேண்டும் என்று உணவு பாதுகாப்புத் துறை அனுப்பியுள்ள சுற்றறிக்கை குறித்து தனக்கு எதுவும் தெரியாது என்றார்.

மேலும் அதிமுக, பாஜக கூட்டணியில் தான் இருக்கிறது எனவும்; ஈரோடு கிழக்கு இடைத்தேர்தலில் கூட்டணியில் தான் போட்டியிட்டோம் என்றும்; நாடாளுமன்றத் தேர்தலுக்கும் கூட்டணியோடு தான் பயணம் செய்து வருகிறோம் எனவும் எடப்பாடி பழனிசாமி தெரிவித்தார்.

இதையும் படிங்க:நாமக்கல் - துறையூர் செல்லும் சாலையை 4 வழிச்சாலையாக மாற்ற நடவடிக்கை: அமைச்சர் எ.வ.வேலு