'தமிழ்நாட்டில் இந்தி கற்கும் ஆர்வம் அதிகரிப்பு'- இந்தி பிரசார சபா பொதுச்செயலாளர் பேட்டி!

சென்னை: தமிழ்நாட்டில் இந்தி கற்கும் ஆர்வம் அதிகரித்துள்ளதாக தக்ஷிண பாரத் இந்தி பிரசார சபாவின் பொதுச் செயலாளர் ஜெயராஜ் தெரிவித்துள்ளார்.

தக்ஷிண பாரத் இந்தி பிரசார சபா பொதுச்செயலாளர் ஜெயராஜ் நமது ஈடிவி பாரத் தமிழ்நாடு ஊடகத்துக்கு அளித்த சிறப்புப் பேட்டியில், " இந்தி பிரசார சபாவின் சார்பில் பிப்ரவரி மற்றும் ஆகஸ்ட் ஆகிய இரு பருவங்களில் இந்தித் தேர்வுகள் நடத்தப்பட்டு வருகிறது. ஒவ்வொரு ஆண்டும் இந்த இந்தித் தேர்வு எழுதுபவர்களின் எண்ணிக்கை உயர்ந்து கொண்டுதான் உள்ளது.

கடந்த பிப்ரவரியில் நடைபெற்ற தேர்வில் சென்னையிலிருந்து மட்டும் 70 ஆயிரம் பேரும், தமிழ்நாட்டின் பிற மாவட்டங்களில் இருந்து 1 லட்சத்து 25 ஆயிரம் பேரும் தேர்வு எழுதியுள்ளனர். தற்போது மாணவர்களிடையே ஏற்பட்டுள்ள விழிப்புணர்வால், அதிகளவிலான மாணவர்கள் இந்தி படிக்க விரும்புகிறார்கள். பெற்றோர்களும் தங்கள் குழந்தைகள் இந்தி படிக்க வேண்டும் என விரும்புகின்றனர்.

அதனால், பள்ளிகளில் மாணவர்களுக்கு பாடங்களைத் தேர்வு செய்வது போல், இந்தியையும் தேர்வு செய்கின்றனர். இந்தியாவிலேயே அதிகம் பேசக்கூடிய மொழியான இந்தி தெரிந்திருந்தால், வேலைவாய்ப்பும் கிடைக்கும். இந்தி பிரசார சபாவின் மூலம் ஆந்திரா, கர்நாடகா, தெலங்கானா, கேரளா ஆகிய மாநிலங்களிலும் தேர்வுகளை நடத்துகிறோம்.

இந்தி எதிர்ப்பு, இந்தி திணிப்பு என்ற பிரச்னை இல்லாததால் பள்ளிகளிலேயே இந்தியை கற்றுத் தருகின்றனர். இருந்தபோதிலும், இந்தி பிரசார சபா நடத்தும் தேர்வினை மாணவர்கள் எழுதுகின்றனர். தென் மாநிலங்களில் இருந்து ஒரு பருவத்திற்கு 6 லட்சம் மாணவர்கள் தேர்வினை எழுதுகின்றனர்.

மும்மொழிக்கொள்கை என்ற அரசின் கொள்கை முடிவு குறித்து நாங்கள் கருத்து கூற முடியாது. இந்நிறுவனம் அரசியலுக்கு அப்பாற்பட்டு மகாத்மா காந்தியால் தொடங்கப்பட்டது. புதிய கல்விக் கொள்கையில் மும்மொழிக் கொள்கைக்கு நல்ல வரவேற்பு இருக்கும் என கருதுகிறேன். மற்ற மாநிலங்களை விட தமிழ்நாட்டில் கூடுதலாக ஒரு மொழியைக் கற்க மாணவர்கள் விரும்புகின்றனர்' என்றார்.

இதையும் படிங்க:மும்மொழிக் கொள்கைக்கு நோ சொன்ன வைரமுத்து!