'உயர் பாதுகாப்பு நம்பர் பிளேட் பொருத்துவது தொடர்பான டெண்டர் ரத்து'

தமிழ்நாட்டில் பழைய வாகனங்களுக்கு உயர் பாதுகாப்பு நம்பர் பிளேட்டுகள் பொருத்துவது தொடர்பாக, கடந்த ஆண்டு வெளியிடப்பட்ட டெண்டர் ரத்து செய்யப்பட்டுவிட்டதாக தமிழ்நாடு அரசு சென்னை உயர் நீதிமன்றத்தில் தெரிவித்துள்ளது.

சென்னை:வாகனங்கள் மூலமாக நடக்கும் குற்றங்களைத் தடுக்கும் வகையில், உயர் பாதுகாப்பு நம்பர் பிளேட்டுகள் பொருத்தும் திட்டம் 2001ஆம் ஆண்டு அறிமுகம் செய்யப்பட்டது. இதன் அடிப்படையில், 2019ஆம் ஆண்டுக்கு முன்பாக தயாரித்த வாகனங்களுக்கு உயர் பாதுகாப்பு நம்பர் பிளேட்டுகளைப் பொருத்தும் பணியை அமல்படுத்த தமிழ்நாடு அரசு 2021ஆம் ஆண்டு ஜனவரியில் டெண்டர் வெளியிட்டது.

இந்த டெண்டரை எதிர்த்து யார்யா சேகர் என்ற நிறுவனத்தின் இயக்குநர் செந்தாமரை தொடர்ந்த வழக்கில், மத்திய அரசு அறிவிப்பின்படி மத்திய அரசின் உரிமம் பெற்ற நிறுவனங்கள் தான் அந்த பணியை மேற்கொள்ள வேண்டும் எனக் கூறி டெண்டரை ரத்து செய்ய வேண்டும் எனக் கோரிக்கை வைத்திருந்தார்.

உயர் பாதுகாப்பு நம்பர் பிளேட் பொருத்தும் உத்தரவின்படியும், மத்திய அரசு அறிவுரைப்படியும் அந்தப் பணிகளை அமல்படுத்த மாநில அரசுக்கு அதிகாரம் உள்ளது எனக் கூறி மனுவை தள்ளுபடி செய்து தனி நீதிபதி உத்தரவிட்டார்.

மேல்முறையீடும் அதன் முடிவும்:இந்த உத்தரவை எதிர்த்து செந்தாமரை தொடர்ந்த மேல்முறையீடு வழக்கு தலைமை நீதிபதி முனீஷ்வர்நாத் பண்டாரி மற்றும் நீதிபதி பரத சக்ரவர்த்தி அமர்வில் இன்று (ஏப்ரல் 2) விசாரணைக்கு வந்தது. அப்போது நீதிபதிகள், டெண்டர் இறுதி செய்யப்படுகிறதா? அல்லது ரத்து செய்யப்படுகிறதா? என தமிழ்நாடு அரசிடம் விளக்கம் கேட்டனர். அரசுத் தரப்பில், டெண்டர் ரத்து செய்யப்பட்டுவிட்டதாகத் தெரிவிக்கப்பட்டது.

இதைப்பதிவு செய்த நீதிபதிகள், டெண்டர் ரத்து செய்யப்பட்டுவிட்டதால் மேல்முறையீடு வழக்கு செல்லத்தக்கதல்ல எனக் கூறி தள்ளுபடி செய்து உத்தரவிட்டனர்.

இதையும் படிங்க: புதுச்சேரியில் உயர்த்தப்பட்ட மின் கட்டணம் அமலுக்கு வந்தது