சென்னை: சென்னை மருத்துவக் கல்லூரியின் மறுசீரமைக்கப்பட்ட விளையாட்டு மைதானத்தை மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன், இந்து சமய அறநிலையத்துறை அமைச்சர் சேகர்பாபு ஆகியோர் திறந்து வைத்தனர்.
இதையடுத்து செய்தியாளர்களைச் சந்தித்த அமைச்சர் மா.சுப்பிரமணியன், “மருத்துவக் கல்லூரி மாணவர்களின் பயன்பாட்டிற்காக மறுசீரமைக்கப்பட்ட விளையாட்டு மைதானம் திறந்து வைக்கப்பட்டுள்ளது.
ராஜீவ்காந்தி அரசு மருத்துவமனையில் 55 ஆயிரத்து 52 பேர் கரோனா தொற்றால் பாதிக்கப்பட்டு சிகிச்சை பெற்றுள்ளனர். மருத்துவமனையில், 2 ஆயிரத்து 200 படுக்கைகள் உள்ளது. தற்போது 115 பேர் மட்டுமே சிகிச்சை பெற்று வருகின்றனர்.
கருப்பு பூஞ்சை பாதிப்பு
கருப்பு பூஞ்சை நோயால் தமிழ்நாட்டில் 3 ஆயிரத்து 697 பேர் பாதிக்கப்பட்டுள்ளனர். ராஜீவ்காந்தி மருத்துவமனையில் கருப்பு பூஞ்சை நோயால் 778 பேர் பாதிக்கப்பட்டு அதில் 216 பேர் குணமடைந்து வீடு திரும்பியுள்ளனர். மேலும், 456 பேர் சிகிச்சை பெற்று வருகின்றனர்.
புதிதாக பதவியேற்றுள்ள ஒன்றிய சுகாதாரத் துறை அமைச்சர் அனுமதியளித்தால் இன்று (ஜூலை 08) மாலை டெல்லி பயணம் மேற்கொள்வேன்.
இல்லையெனில் சந்திக்க அனுமதியளித்ததும் ஓரிரு நாள்களில் டெல்லி பயணம் மேற்கொண்டு ஒன்றிய சுகாதாரத்துறை அமைச்சரை சந்திப்பேன். ஏற்கனவே திட்டமிட்டபடி சுகாதாரத்துறை செயலாளர் இன்று மாலை டெல்லி செல்ல இருக்கிறார்.
தடுப்பூசி குறித்த விவரங்கள்
தமிழ்நாட்டிற்குத் தடுப்பூசி வழங்குவது, எய்ம்ஸ் மருத்துவமனை பணிகள், 11 புதிய மருத்துவக் கல்லூரி பணிகள் தொடர்பாக தமிழ்நாட்டின் கருத்துகளை ஒன்றிய சுகாதாரத்துறை செயலாளரிடம் அவர் தெரிவிப்பார்.
மேலும், கரோனா மூன்றாவது அலையை எதிர்கொள்வதற்குத் தமிழ்நாடு அரசு தயாராகவுள்ளது. ஆக்சிஜன் அளவு ஒரு நாள் இருப்பு தற்போது 900 மெட்ரிக் டன் அளவில் உள்ளது. கரோனா தொற்று முழுமையாக குறைந்த பிறகு ஸ்டெர்லைட் ஆலை மூடுவது குறித்து முடிவெடுக்கப்படும்.
தமிழ்நாட்டிற்கு இதுவரை 1 கோடிய 59 லட்சத்து 26 ஆயிரத்து 50 தடுப்பூசி வந்துள்ளது. 1 கோடிய 59 லட்சத்து 58 ஆயிரத்து 420 தடுப்பூசிகள் போடப்பட்டுள்ளது. 1 லட்சத்து 74 ஆயிரத்து 730 தடுப்பூசிகள் கையிருப்பில் உள்ளது. அடுத்து ஜூலை 11ஆம் தேதி தமிழ்நாட்டிற்குத் தடுப்பூசி வரும்” என தெரிவித்தார்.
இதையும் படிங்க: மேகதாது அணை விவகாரம்: ஓபிஎஸ் அறிக்கை!
