'5,8ஆம் வகுப்பு மாணவர்கள் அதே பள்ளியில் பொதுத்தேர்வு எழுதலாம்'

சென்னை: 5, 8ஆம் வகுப்பு மாணவர்களுக்கு அவர்கள் படிக்ககூடிய பள்ளிகளில் பொதுத்தேர்வு நடத்தப்படும் என தொடக்கக்கல்வித் துறை அறிவித்துள்ளது.

இந்த ஆண்டு முதல் 5, 8ஆம் வகுப்புகளுக்கு பொதுத்தேர்வு நடைபெறும் என தமிழ்நாடு அரசு அறிவித்திருந்தது. இந்நிலையில், கடந்த அக்டோபர் மாதம் தொடக்கக்கல்வித் துறை இயக்குநரகம் சார்பில் மாவட்ட முதன்மைக் கல்வி அலுவலர்களுக்கு அனுப்பப்பட்ட கடிதத்தில், 5ஆம் வகுப்பிற்கு 1 கிலோமீட்டர் தொலைவிலும், 8ஆம் வகுப்பிற்கு மூன்று கிலோமீட்டர் தொலைவிலும் தேர்வு மையங்களை அமைக்க வேண்டும் எனத் தெரிவிக்கப்பட்டிருந்தது.

இந்த அறிவிப்பால் பொதுத்தேர்வு எழுதும் மாணவர்கள் தாங்கள் பயிலும் பள்ளிகளில் தேர்வெழுத முடியாத நிலை ஏற்பட்டுள்ளது. அரசின் இந்த முடிவு மாணவர்கள், பெற்றோர் மத்தியில் கடும் அதிர்ச்சியை ஏற்படுத்தியது.

ஏற்கனவே 5, 8ஆம் வகுப்புகளுக்கு பொதுத்தேர்வு நடத்துவதற்கு கடுமையான எதிர்ப்பு கிளம்பிய நிலையில், இச்செய்தி எதிர்த்து கடும் எதிர்ப்பலை எழுந்தது.

இதையடுத்து 5, 8ஆம் வகுப்பு பொதுத்தேர்வு எழுதக்கூடிய மாணவர்கள் தாங்கள் படிக்கும் பள்ளியிலேயே தேர்வு எழுதலாம் என்று தொடக்கக் கல்வி இயக்குநரகம் அறிவித்துள்ளது.

இதையும் படிங்க:‘5, 8ஆம் வகுப்பு பொதுத்தேர்வினை ரத்து செய்ய வேண்டும்’