சென்னை: சிங்கப்பூரிலிருந்து இண்டிகோ ஏர்லைன்ஸ் பயணிகள் விமானம் சென்னை சர்வதேச விமான நிலையத்திற்கு வந்தது. அதில் வந்த பயணிகளை சென்னை விமான நிலைய சுங்க அதிகாரிகள் சோதனையிட்டனர். அப்போது ஒரு பெண் பயணி மீது சந்தேகம் ஏற்பட்டது. அவர் வைத்திருந்த கைப்பையை சோதித்த போது, அதனுள் தங்க வளையல்கள், தங்க செயின்கள், மற்றும் தங்க பசை அடங்கிய பார்சல் இருந்ததைக் கண்டுபிடித்து பறிமுதல் செய்தனர். அதோடு அந்த பெண் பயணியையும் கைது செய்து விசாரணை மேற்கொண்டனர்.
அதேபோல், துபாயிலிருந்து ஏர் இந்தியா பயணிகள் விமானம் சென்னை சர்வதேச விமான நிலையத்திற்கு வந்தது. அதில் வந்த சென்னையைச் சேர்ந்த ஒரு ஆண் பயணி மீது சந்தேகத்தில் பிடித்து விசாரணை நடத்தினர். அவருடைய உள்ளாடைக்குள் மறைத்து வைத்திருந்த தங்கப் பசை பார்சலை பறிமுதல் செய்தனர். அந்தப் பயணியையும் கைது செய்து விசாரணை நடத்துகின்றனர்.
இலங்கையின் தலைநகர் கொழும்பிலிருந்து, ஸ்ரீலங்கன் ஏர்லைன்ஸ் பயணிகள் விமானம் சென்னை சர்வதேச விமான நிலையத்திற்கு வந்தது. அதில் வந்த சென்னையைச் சேர்ந்த ஒரு ஆண் பயணி மீது சந்தேகம் ஏற்பட்டது. அவரை நிறுத்தி சோதனை இட்டனர். அவருடைய உள்ளாடைக்குள் மறைத்து வைத்திருந்த ஒரு பார்சலில் தங்கப் பசை இருந்ததை கண்டுபிடித்து, அவரையும் கைது செய்தனர்.