இ-பதிவில் மீண்டும் திருமண பிரிவு சேர்ப்பு!

தமிழ்நாடு அரசின் இ-பதிவு இணையதளத்தில் திருணத்திற்கான பதிவு மீண்டும் சேர்க்கப்பட்டுள்ளது.

கரோனா பாதிப்பு நாளுக்கு நாள் அதிகரித்து வரும் நிலையில், தமிழ்நாடு முழுவதும் மே மாதம் 10ஆம் தேதி முதல் முழு ஊரடங்கு அமலில் இருந்து வருகிறது.

இந்தக் கட்டுப்பாடுகளை மேலும் அதிகரிக்க முடிவு செய்து, மாவட்டம் விட்டு மாவட்டம் செல்வோருக்கு இ-பதிவு கட்டாயமாக்கப்பட்டது. குறிப்பாக, திருமணம், இறப்பு, மருத்துவம் சார்ந்த அவசரப் பணிகளுக்கு இ-பதிவு செய்து பயணம் மேற்கொள்ளலாம் எனத் தமிழ்நாடு அரசு சார்பில் அறிவுறுத்தப்பட்டது. ஆனால், இ-பதிவு முறையில் திருமணம் என்ற பிரிவை பலர் தவறாகப் பயன்படுத்தி, வெளியூர் செல்வதாகக் கூறி, அதனை இ-பதிவு பிரிவிலிருந்து நேற்று(மே.17) தமிழ்நாடு அரசு நீக்கியது.

ஆனால், திருமண பிரிவை மீண்டும் சேர்க்கவேண்டும் என பொதுமக்கள் தரப்பில் கோரிக்கை விடுக்கப்பட்டது.

இந்நிலையில் இன்று(மே.18), இ-பதிவு இணையதளத்தில் மீண்டும் திருமணம் என்ற பிரிவு சேர்க்கப்பட்டுள்ளது.