தி.நகரில் மதுபோதையில் கார் ஓட்டிய நபருக்கு தர்மஅடி!

சென்னை: தி.நகர் அருகே மதுபோதையில் காரை ஓட்டிவந்து விபத்தை ஏற்படுத்திய நபரை மடக்கிப்பிடித்த பொதுமக்கள், அவருக்கு தர்மஅடி கொடுத்துள்ளனர்.

சென்னை தியாகராயர் நகர் அருகே வசித்துவருபவர் பூபாலன். இவர் வழக்கறிஞர் ஒருவரின் அலுவலகத்தில் பணிபுரிந்துவருகிறார்.

இந்த நிலையில், நந்தனம் சிஐடி நகரிலிருந்து பூபாலன் தனது காரை மதுபோதையில் ஓட்டி வந்ததாகத் தெரிகிறது. அப்போது வெங்கட் நாராயணன் தெரு வழியாக சிவஞானம் தெருவிற்குள் பூபாலன் நுழைய முற்பட்டபோது அவரது கார் கட்டுப்பாட்டை இழந்து அந்த வழியாக சென்றுகொண்டிருந்த அரியலூர் மாவட்டத்தைச் சேர்ந்த பரமேஸ்வரன் என்பவர் மீது மோதியுள்ளது.

இந்த விபத்தில் படுகாயமடைந்த பரமேஸ்வரன் சிகிச்சைக்காக ராயப்பேட்டை அரசு மருத்துவமனையில் சேர்க்கப்பட்டுள்ளார். இதற்கிடையே, பூபாலனை மடக்கிப்பிடித்த பொதுமக்கள், அவருக்கு தர்மஅடி கொடுத்துவிட்டு, காவல் துறையினரிடம் ஒப்படைத்தனர்.

பின்னர் இது குறித்து போக்குவரத்துப் புலனாய்வுப் பிரிவு காவல் துறையினர் வழக்குப்பதிவு செய்து பூபாலானை கைது செய்து விசாரணை மேற்கொண்டுவருகின்றனர்.