விவசாயிகளிடமிருந்து பணத்தை பறிப்பதை பறக்கும்படை தடுக்க நடவடிக்கை வேண்டும்!

சென்னை: தேர்தல் பறக்கும் படையினர் விவசாய விளைபொருள்கள் விற்பனை செய்த பணத்தை விவசாயிகளிடம் பறிமுதல் செய்வதை தடுக்க வேண்டும் என்று தமிழக விவசாய சங்க மாநிலத் தலைவர் மணிகண்டன் தமிழ்நாடு தலைமை தேர்தல் அலுவலரிடம் மனு அளித்துள்ளார்.

தமிழ்நாட்டில் தேர்தல் தேதி அறிவிக்கப்பட்டதைத் தொடர்ந்து தேர்தல் நடத்தை விதிகள் அமலில் உள்ளன. இதனால், குறிப்பிட்ட அளவு தொகைக்கு மேல் எவ்வித ஆவணங்களுமின்றி எடுத்துச் செல்ல பல கட்டுப்பாடுகள் விதிக்கப்பட்டுள்ளன. இந்நிலையில், விவசாய விளைபொருள்கள் விற்பனை செய்த பணத்தை விவசாயிகளிடம் பறிமுதல் செய்வதை தேர்தல் பறக்கும் படையினர் தடுக்க வேண்டும் என தமிழக விவசாய சங்க மாநிலத் தலைவர் மணிகண்டன் தமிழ்நாடு தலைமை தேர்தல் அலுவலரிடம் மனு அளித்துள்ளார்.

இது குறித்து செய்தியாளர்களிடம் பேசிய அவர், "தமிழகத்தில் உள்ள விவசாயிகள் தங்கள் விளை பொருள்களான நெல், உளுந்து, பருத்தி உள்ளிட்ட பயிர்களை மார்க்கெட் கமிட்டி, விவசாய கமிஷன் கமிட்டி ஆகிய இடங்களில் விற்பனை செய்த பின்பு திரும்பும்போது விவசாயிகளிடம் பறக்கும் தேர்தல் படையினர் பணத்தை பறிமுதல் செய்து வருகின்றனர். மேலும் விவசாய பொருள்களை விற்றுவிட்டு வருவதாக விவசாயிகள் தெரிவித்தாலும் மற்றும் அதற்கான ஆதாரமாக சாக்குப் பைகளை காட்டினாலும் பறக்கும் தேர்தல் படையினர் அதை பொருட்படுத்தாமல் விவசாயிகளின் பணத்தை பறிமுதல் செய்கின்றனர்.

விற்பனைக்கான ரசீது ஏதும் வழங்கப்படவில்லை என்று கூறினாலும் தேர்தல் அலுவலர்கள் விடுவதாக தெரியவில்லை. இதனைத் தடுக்க வலியுறுத்தி சென்னை தலைமைச் செயலகத்தில் தமிழக தேர்தல் அலுவலர் சத்யபிரத சாகுவிடம் மனு அளித்துள்ளோம். இதுகுறித்து நடவடிக்கை எடுப்பதாக அவர் உறுதி அளித்துள்ளார்.

இதே போன்று புரெவி, நிவர், புயல் வெள்ளத்தால் பாதிக்கப்பட்ட விவசாயிகளுக்கு இதுவரை 8 சதவீத நிவாரணம் வழங்கப்பட்டுவிட்டது; மீதமுள்ள விவசாயிகளுக்கு தேர்தல் காரணமாக நிவாரணம் நிறுத்திவைக்கப்பட்டுள்ளது. எனவே இந்த நிவாரணத் தொகையையும் வழங்க வேண்டும். கரும்பு விவசாயிகளின் ஊக்கத்தொகை மற்றும் நிலுவை தொகையை வழங்க வேண்டும் என்றும் கோரிக்கை வைத்தோம். இந்தக் கோரிக்கைகளையே தமிழக வேளாண் துறை செயலரிடமும் வலியுறுத்தினோம்” எனக் கூறினார்.