2ஆவது தவணை கரோனா நிதி: நாளை தொடங்கி வைக்கும் முதலமைச்சர் ஸ்டாலின்

சென்னை: கரோனா நிவாரண நிதியின் இரண்டாவது தவணையாக 2,000 ரூபாய் வழங்கும் திட்டம் உள்ளிட்ட பல்வேறு திட்டங்களை நாளை தலைமைச் செயலகத்தில் முதலமைச்சர் ஸ்டாலின் தொடங்கி வைக்கிறார்.

நாளை (ஜூன்.03) காலை 10.30 மணிக்கு சென்னை, தலைமைச் செயலகத்தில் முதலமைச்சர் மு.க.ஸ்டாலின் பல்வேறு திட்டப் பணிகளைத் தொடங்கி வைக்கிறார். அதன்படி,

• கரோனா நிவாரண நிதியுதவியின் இரண்டாவது தவணை 2,000 ரூபாய் வழங்கும் திட்டம்.
• குடும்ப அட்டைதாரர்களுக்கு 14 மளிகைப் பொருள்களை இலவசமாக வழங்கும் திட்டம்.
• தமிழ்நாடு அரசு அறநிலையத் துறையின் கீழ் 12,959 கோயில்களில் மாதச் சம்பளமின்றி பணிபுரியும் 14 ஆயிரத்திற்கு மேற்பட்ட அர்ச்சகர்கள், பூசாரிகள், பணியாளர்களுக்கு கரோனா நிவாரண உதவியாக 4,000 ரூபாய், 10 கிலோ அரிசி, 13 வகை மளிகைப் பொருள்கள் வழங்கும் திட்டம்.
• கரோனாவால் உயிரிழந்த பத்திரிகையாளர்கள் குடும்பத்தினருக்கு 10 லட்சம் ரூபாய் நிதி உதவி வழங்கும் திட்டம்.
• கரோனாவால் உயிரிழந்த மருத்துவர், மருத்துவப் பணியாளர், காவலர், நீதிபதிகள் ஆகியோரின் குடும்பத்தினருக்கு 25 லட்சம் ரூபாய் நிதி உதவி.
• மேலும், ’உங்கள் தொகுதியில் முதலமைச்சர்’ திட்டப் பயனாளிகள் 10 பேருக்கு நலத்திட்ட உதவிகளை வழங்க உள்ளார்.