கரோனா பாதிப்புக்கு இழப்பீடு கோரி மனு: மத்திய-மாநில அரசு பதிலளிக்க உத்தரவு

சென்னை: கரோனாவால் உயிரிழந்தவர் குடும்பத்துக்கு பேரிடர் மேலாண்மை சட்டத்தின் கீழ், ரூ. 4 லட்சம் இழப்பீடு வழங்க கோரிய வழக்கில் மத்திய-மாநில அரசுகள் பதிலளிக்க சென்னை உயர் நீதிமன்றம் உத்தரவிட்டுள்ளது.

காஞ்சிபுரத்தைச் சேர்ந்த சி.வி. ஹரி கிருஷ்ணன் சென்னை உயர் நீதிமன்றத்தில் மனு ஒன்றைத் தாக்கல் செய்துள்ளார். அந்த மனுவில், தனது தந்தை சி.வி.ராஜசேகர் கரோனா தொற்றால் உயிரிழந்ததாக குறிப்பிட்டுள்ளார்.

பேரிடர் மேலாண்மை சட்டப்பிரிவு 12 உட்பிரிவு 3 கீழ் பேரிடரால் ஏற்படக்கூடிய உயிரிழப்புகளுக்கு குறைந்தபட்ச நிவாரணம் வழங்க வேண்டும் என்றும், அதுகுறித்து மாநில அரசுகள் வழிகாட்டு நெறிமுறைகளை கொண்டு வரவேண்டும் என்று தெரிவித்திருந்தார்.

மாநில அரசு வழிகாட்டு நெறிமுறைகளை கொண்டு வரவில்லை என்றால், மத்திய அரசினுடைய குறைந்தபட்ச நிவாரணம் வழங்க கூடிய வழிகாட்டு நெறிமுறைகள் பொருந்தும்.

அதன்படி, பேரிடர் மேலாண்மை சட்டத்தின் கீழ் கரோனாவால் உயிரிழந்தோரின் குடும்பத்துக்கு ரூ. 4 லட்சம், கரோனோ பாதிப்பால் ஒரு வாரம் சிகிச்சை பெற்றவர்களுக்கு ரூ. 4 ஆயிரத்து 300, ஒரு வாரத்துக்கு மேல் சிகிச்சை பெறக் கூடியவர்களுக்கு ரூ. 12 ஆயிரத்து 700 வழங்க வேண்டும் என்று மத்திய அரசின் 2016ஆம் விதிமுறைகள் உள்ளதாகவும் தெரிவித்துள்ளார்.

உச்ச நீதிமன்றத்தில் கரோனா தொடர்பான பொதுநல வழக்கு விசாரணையின்போது, கரோனா உயிரிழப்புகளுக்கும் இந்த வழிகாட்டு நெறிமுறைகள் பொருந்தும் என்று மத்திய அரசு தெரிவித்துள்ளது.

அதனால், தனது தந்தைக்கு உரிய இழப்பீடு வழங்க வேண்டும் என்று காஞ்சிபுரம் மாவட்ட ஆட்சியரிடம் மனு அளித்ததாகவும், ஆனால் இதுகுறித்து எந்த நடவடிக்கை எடுக்கப்படவில்லை என்றும், இதில் நீதிமன்றம் தலையிட்டு உரிய நிவாரணம் வழங்க வேண்டும் என்று கேட்டுக்கொண்டிருந்தார்.

இந்த வழக்கை விசாரித்த நீதிபதி புஷ்பா சத்தியநாராயணா, வழக்கு குறித்து தமிழ்நாடு அரசும், மத்திய அரசும் பிப்ரவரி 4ஆம் தேதிக்குள் பதிலளிக்க உத்தரவிட்டு, விசாரணையை ஒத்தி வைத்துள்ளார்.

இதையும் படிங்க: கரோனா பணியாளர்களுக்கு வித்தியாச வாழ்த்து சொன்ன சமூக ஆர்வலர்!