மருத்துவர்கள் போராட்டத்திற்கு சமூக மருத்துவர் சங்கம் ஆதரவு

சென்னை: இந்திய மருத்துவச் சங்கம் சார்பில் நடைபெற்றுவரும், நாடு தழுவிய ஒருநாள் வேலைநிறுத்தப் போராட்டத்திற்கு சமூக மருத்துவர் சங்கம் ஆதரவு தெரிவித்துள்ளது.

சென்னை சேப்பாக்கம் பத்திரிகையாளர் மன்றத்தில் சமூக சமத்துவத்திற்கான மருத்துவர் சங்கத்தின் பொதுச்செயலாளர் ரவீந்திரநாத் செய்தியாளர்களை சந்தித்தார்.

அப்போது பேசிய அவர், 'மருத்துவமனைகளை, மருத்துவர்களை பாதுகாப்பதற்கான சட்டத்தை கொண்டுவர மத்திய அரசை வலியுறுத்தியும் மேற்குவங்கம் மாநிலம் கொல்கத்தாவில் உள்ள என்.ஆர்.எஸ். மருத்துவமனையில் இளநிலை மருத்துவர்கள் ஒரு கும்பலால் தாக்கப்பட்டதைக் கண்டித்தும், மருத்துவர்களை தாக்கியவர்கள் மீது நடவடிக்கை எடுக்காத மேற்கு வங்க அரசை கண்டித்தும் இன்று காலை ஆறு மணி முதல் நாளை காலை ஆறு மணிவரை இந்திய மருத்துவச் சங்கம் சார்பில் நடைபெற்றுவரும், நாடு தழுவிய ஒருநாள் வேலை நிறுத்தப் போராட்டத்திற்கு, சமூக சமத்துவத்திற்கான மருத்துவர்கள் சங்கம் முழு ஆதரவை தெரிவித்துக் கொள்கிறது.

வேலை நிறுத்தத்தில் ஈடுபடுவதற்கு மருத்துவர்களுக்கு உள்ள உரிமையை மம்தா பானர்ஜி கொச்சைப்படுத்தியிருப்பது கண்டனத்திற்குரியது. குறிப்பாக, மருத்துவர்கள் தாக்கப்படுவதற்கான மிக முக்கியக் காரணம், அரசு மருத்துவமனைகளின் மோசமான செயல்பாடும், பொது சுகாதாரத்துறை மீது மக்கள் நம்பிக்கை இழந்ததும்தான்.

மருத்துவம் தனியார் மயமானதற்கும், கார்ப்பரேட் மயமானதற்கும் மத்திய பாஜக அரசுகளின் மக்கள் விரோத தேசிய நலக் கொள்கைகளே காரணம். மருத்துவக் கல்லூரிகளில் பேராசிரியர்களின் எண்ணிக்கையை குறைத்திடும் வகையில் மத்திய அரசு செயல்பட்டுள்ளது.

இதனால் நோயாளிகள் கடுமையான சிரமங்களுக்கு உள்ளாகியுள்ளனர். நோயாளிகளின் எண்ணிக்கைக் கேற்ப மருத்துவர்கள், மருத்துவ ஊழியர்களின் எண்ணிக்கையையும், மருத்துவக் கட்டமைப்பு வசதிகளையும் அதிகரிக்க வேண்டும்.

உடனடியாக, மத்திய அரசு மருத்துவச் சங்கத் தலைவர்களை அழைத்துப் பேச வேண்டும், அவர்களது நீண்ட கால கோரிக்கைகளை உடனடியாக ஏற்க வேண்டும் என்று மத்திய அரசை சமூக சமத்துவத்திற்கான மருத்துவர்கள் சங்கம் வலியுறுத்திக் கேட்டுக் கொள்கிறது' என்றார்.