சென்னை: அண்ணா பல்கலைக்கழகத்தின் 42ஆவது பட்டமளிப்பு விழாவில் பிரதமர் மோடி கலந்துகொண்டார். அப்போது பேசிய அவர், “வலிமையான அரசு என்றால் அனைத்தையும் மற்றும் அனைவரையும் கட்டுப்படுத்த வேண்டும் என்ற கருத்து முன்பு இருந்தது. ஆனால், நாங்கள் இந்த மனப்பான்மையை மாற்றியுள்ளோம். ஒரு வலுவான அரசாங்கம் எல்லாவற்றையும் அல்லது அனைவரையும் கட்டுப்படுத்தாது.
ஒரு வலுவான அரசாங்கம் கட்டுப்படுத்துவது அல்ல, ஆனால் பதிலளிக்கக்கூடியது. ஒரு வலுவான அரசாங்கம் ஒவ்வொரு களத்திலும் நகராது. அது தன்னைக் கட்டுப்படுத்திக் கொண்டு, மக்களின் திறமைகளுக்கு இடமளிக்கிறது. ஒரு வலிமையான அரசாங்கத்தின் பலம், தன்னால் அனைத்தையும் அறியவோ அல்லது செய்யவோ முடியாது என்பதை ஏற்றுக்கொள்ளும் மனத்தாழ்மையில் உள்ளது” என்றார்.
தொடர்ந்து புதிய தேசிய கல்விக் கொள்கையை பற்றி பேசும்போது, “இந்த புதிய தேசிய கல்விக் கொள்கையானது, வளர்ந்து வரும் சூழ்நிலைகளுக்கு ஏற்ப முடிவுகளை எடுக்க இளைஞர்களுக்கு அதிக சுதந்திரத்தை உறுதி செய்கிறது” என தெரிவித்தார்.
முதலமைச்சர் மு.க. ஸ்டாலின் பேசுகையில், “கல்வி ஒரு சொத்து; கல்விக்கு எந்த தடையும் இருக்கக்கூடாது என்று நாங்கள் நம்புகிறோம். அதனால் தான் நமது ‘திராவிட மாடல்’ அரசு எழுத்தறிவை அதிகரிப்பதை முதன்மை இலக்காகக் கொண்டு செயல்பட்டு வருகிறது. திராவிட இயக்கத்தின் சமூக நீதிக் கோட்பாட்டின் அடித்தளம் கல்விதான்.
மேலும் பட்டதாரிகள் பட்டம் பெற்றதில் பெருமிதம் கொள்ள வேண்டும். ஆனால் அவர்கள் பிரதமரின் உயர் அலுவலகத்திடமும் மற்றும் மோடியிடமும் பட்டங்களைப் பெறுவதைப் பற்றி பெருமிதம் கொள்ள வேண்டும்” என்றார்.
தொடர்ந்து பள்ளி, கல்லூரிகளில் மாணவர் சேர்க்கையை அதிகரிக்க தனது மாநில அரசு செய்து வரும் நலத்திட்டங்களை முதலமைச்சர் பட்டியலிட்டார். “கல்விப் புரட்சியைக் கொண்டு வருகிறோம். மாணவர்கள் பட்டம் பெறுவதை நாங்கள் கட்டுப்படுத்த விரும்பவில்லை. ஆனால் நாங்கள் வேலை வாய்ப்புகள், வாழ்க்கை திறன்கள் மற்றும் சமூக வளர்ச்சிக்கு உதவுகிறோம்," என்றார்.
என்ஐஆர்எஃப் தரவரிசை மற்றும் தொழில்துறை வளர்ச்சியில் தமிழ்நாட்டின் உயர்கல்வி நிறுவனங்கள் அதிக மதிப்பெண் பெற்றதை முதலமைச்சர் நினைவு கூர்ந்தார். தொடர்ந்து உயர்கல்வித் துறை அமைச்சர் க.பொன்முடி வரவேற்றுப் பேசுகையில், “நுழைவுத் தேர்வு ரத்து செய்யப்பட்டதன் மூலம் உயர்கல்விக்கு சேரும் மாணவர்களின் எண்ணிக்கையை மாநிலம் அதிகரிக்க முடிந்தது. தமிழ்நாட்டின் உயர்கல்வித் துறைக்கு பிரதமர் மோடி ஆதரவளிக்க வேண்டும்” என வேண்டுகோள் விடுத்தார்.
இந்த நிகழ்ச்சியில் ஆளுநர் ஆர்.என். ரவி மத்திய இணை அமைச்சர் எல். முருகன், அண்ணா பல்கலைக்கழக துணை வேந்தர் வேல்ராஜ், மாணவர்கள், ஆசிரியர்கள் உள்பட பலர் கலந்துகொண்டனர்.
இதையும் படிங்க:'நாளைய தலைவர்களை உருவாக்குவதில் ஆசிரியருக்கு பங்குண்டு' - பிரதமர் மோடி
