சென்னை: தமிழ் சினிமாவின் முன்னணி நடிகர்களில் ஒருவரான கமல்ஹாசன், இன்று (நவ.7) தனது 69வது பிறந்தநாளைக் கொண்டாடுகிறார். இந்த நிலையில், திரைப்பிரபலங்கள் முதல் அரசியல் பிரமுகர்கள் வரை பலரும் தங்களது பிறந்தநாள் வாழ்த்துகளை கமல்ஹாசனுக்கு தெரிவித்து வருகின்றனர். அந்த வகையில், திமுக தலைவரும், தமிழ்நாடு முதலமைச்சருமான மு.க.ஸ்டாலின் தனது பிறந்தநாள் வாழ்த்துகளைத் தெரிவித்து உள்ளார்.
இது குறித்து முதலமைச்சர் ஸ்டாலின் வெளியிட்டு உள்ள X வலைத்தளப் பதிவில், “கலையுலகில் சாதனைகள் பல படைக்கும் கலைஞானி, மக்கள் நீதி மய்யம் தலைவர் கமல்ஹாசனுக்குப் பிறந்தநாள் வாழ்த்துகள். நலம் சூழ வாழிய பல்லாண்டு” என தெரிவித்து உள்ளார். மக்கள் நீதி மய்யம் கட்சியின் தலைவராக உள்ள கமல்ஹாசன், சமீபத்தில் திமுக அங்கம் வகிக்கும் INDIA கூட்டணியில் தன்னை இணைத்துக் கொண்டார்.
இதனையடுத்து, மு.க.ஸ்டாலின் உடனான சந்திப்பும் கமலுக்கு இருந்து வந்தது. அது மட்டுமல்லாமல், காங்கிரஸ் மூத்த தலைவர்களில் ஒருவரான ராகுல் காந்தியின் பாரத் ஜோடா யாத்ரா பயணத்தின்போது, ராகுல் காந்தி உடன் கமல்ஹாசன் நடத்திய உரையாடல் தேசிய அளவில் பேசப்பட்டது.