துறைமுகம் - மதுரவாயல் இரண்டடுக்கு பறக்கும் சாலை பணி தள்ளிப்போகிறதா..?

சென்னை துறைமுகம்-மதுரவாயல் இரண்டடுக்கு பறக்கும் சாலைத் திட்டத்திற்கான கட்டுமான பணிகள் இந்த வருடம் இறுதியில் தொடங்கப்படும் என எதிர்பார்க்கப்பட்ட நிலையில், இந்த திட்டத்திற்கான பணிகள் அடுத்த வருடம் மார்ச் மாதம் தொடங்கப்படும் எனவும், இதற்கான ஒப்பந்தம் வெளியிடப்பட்டுள்ளதாகவும் தேசிய நெடுஞ்சாலை துறை தெரிவித்துள்ளது.

சென்னை: தமிழ்நாட்டில் கடந்த 2010ஆம் ஆண்டு திமுக ஆட்சியின்போது, 1,815 கோடி ரூபாய் மதிப்பீட்டில் சென்னை துறைமுகம்-மதுரவாயல் பறக்கும் சாலைத் திட்டம் தொடங்கப்பட்டது. துறைமுகத்திற்கு கனரக வாகனங்கள் அதிகளவில் வருவதால் ஏற்படும் போக்குவரத்து நெரிசலை கட்டுப்படுத்தும் நோக்கில் இத்திட்டம் தொடங்கப்பட்டது. இதற்கு அப்போதைய பிரதமர் மன்மோகன் சிங் அடிக்கல் நாட்டினார்.

இத்திட்டத்திற்கான பணிகள் நடந்து வந்த நிலையில், 2011ஆம் ஆண்டு அதிமுக ஆட்சிக்கு வந்தபோது, சுற்றுச்சூழலை பாதிக்கும் வகையில் கூவம் ஆற்றின் ஓரத்தில் தூண்கள் கட்டப்பட்டதாகக்கூறி இத்திட்டத்திற்கு தடை விதிக்கப்பட்டது. பிறகு 2017ஆம் ஆண்டு இத்திட்டத்திற்கு மத்திய சாலை போக்குவரத்து மற்றும் நெடுஞ்சாலை துறை மற்றும் தமிழ்நாடு அரசு அனுமதி வழங்கியது. எனினும் பல்வேறு காரணங்களால் பணிகள் கிடப்பில் போடப்பட்டன.

பிறகு இத்திட்டம் இரண்டடுக்கு பறக்கும் சாலைத்திட்டமாக மாற்றியமைக்கப்பட்டு, திட்டமதிப்பும் 5,800 கோடியாக உயர்த்தப்பட்டது. ஆனால், இத்திட்டத்திற்கான பணிகள் இதுவரை தொடங்கப்படவில்லை. திமுக மீண்டும் ஆட்சிக்கு வந்துள்ள நிலையில், கிடப்பில் போடப்பட்டுள்ள இந்த பறக்கும் சாலை திட்டப் பணிகளை விரைந்து தொடங்க வேண்டும் என சமூக ஆர்வலர்கள் வலியுறுத்தியுள்ளனர்.

இது குறித்து நகர்ப்புற பொறியாளர் மற்றும் அண்ணா பல்கலைக்கழக ஓய்வு பெற்ற பேராசிரியர் கே.பி.சுப்பிரமணியன் கூறுகையில், "துறைமுகத்தில் இருந்து மதுரவாயல் வரையிலான பறக்கும் சாலை திட்டம், போக்குவரத்து நெரிசலை குறைக்கும் என்பது உண்மை. ஆனால், அதே அளவுக்கு காற்று மாசுபாடும் இருக்கும். சரக்கு வாகனங்களின் போக்குவரத்துக்கும், சுற்றுச்சூழலை மாசுபடுத்தாமலும் இருக்க, ரயில் இணைப்பு என்பது நிலையான தீர்வாக இருந்திருக்கும். இந்த உயர்மட்ட சாலையில் ஏறுதல் மற்றும் இறங்குதல் காரணமாக வாகனங்கள் அதிக எரிபொருளை செலவழிக்க நேரிடும். இது ஒரு செலவு மிகுந்த திட்டமாகும்" என்றார்.

இது குறித்து தேசிய நெடுஞ்சாலை துறையின் சென்னை மண்டல திட்ட இயக்குனர் ஜனகுமார் கூறுகையில், "சென்னையின் இந்த முக்கிய திட்டத்திற்கு 4 தொகுதிகளாக ஒப்பந்தம் கோரப்பட்டுள்ளது. மேலும் 20.5 கி.மீ இரண்டடுக்கு பறக்கும் சாலை திட்டத்தில் எந்த விதமான மாற்றமும் இல்லை. அடுத்த வருடம் மார்ச் மாதம் கட்டுமான பணிகள் தொடங்கப்படும். பணிகள் முடிய ஏறக்குறைய இரண்டரை ஆண்டுகள் எடுக்கும்" என்றார்.

மதுரவாயல் முதல் சென்னை துறைமுகம் வரையில் ஏற்கனவே கட்டப்பட்டுள்ள ஒரு சில தூண்கள் மற்றும் அவைகளின் கம்பிகள் சிதிலமடைந்து உள்ளதே? என்று கேட்டதற்கு, "இந்த திட்டத்திற்கு மொத்தம் 125 தூண்கள் கட்டப்பட்டுள்ளன. இவற்றில் 11 தூண்கள் மட்டும் உடைந்துள்ளது என திட்ட அறிக்கையில் குறிப்பிடப்பட்டுள்ளது. எனவே இவற்றை மட்டும் உடைத்து அதே இடத்தில் மீண்டும் தூண்கள் கட்டப்படும்" என்று கூறினார்.

மத்திய அமைச்சர் நிதின் கட்கரி ட்வீட்

இந்த பறக்கும் சாலை திட்டம் குறித்து, கடந்த அக்டோபர் மாதம் மத்திய சாலை போக்குவரத்து மற்றும் நெடுஞ்சாலை துறை அமைச்சர் நிதின் கட்கரி வெளியிட்டுள்ள ட்விட்டர் பதிவில், இந்த மேம்பாலப் பகுதி நான்கு பிரிவுகளாக பிரிக்கப்பட்டு, சென்னை துறைமுகத்திற்குள் தொடங்கி மதுரவாயல் வரை, அதாவது பெங்களுரு நெடுஞ்சாலை மற்றும் தாம்பரத்தில் இருந்து செல்லும் வெளிவட்ட சாலையில் முடிவடையும் என்று குறிப்பிட்டுள்ளார்.

மத்திய அமைச்சர் நிதின் கட்கரி ட்வீட்

மேலும் இத்திட்டம் 2024 டிசம்பரில் நிறைவடையும் என்றும், இது சென்னை செல்லும் துறைமுகப் போக்குவரத்திற்கான பிரத்யேக சரக்கு வழித்தடமாக செயல்படும் என்றும், சென்னை துறைமுகத்தின் கையாளும் திறனை 48 சதவீதம் அதிகரித்து, துறைமுகத்தில் காத்திருக்கும் நேரத்தை 6 மணி நேரம் வரை குறைக்கும் என்றும் குறிப்பிட்டிருந்தார்.