ஊரடங்கில் மது விற்பனை... ஒரே நாளில் 99 பேர் கைது!

சென்னை: தமிழ்நாடு முழுவதும் சட்ட விரோதமாக மதுபானம் விற்பனை செய்த 99 பேரை மதுவிலக்கு அமலாக்கப் பிரிவு காவல் துறையினர் கைது செய்தனர்.

கரோனா வைரஸ் பரவலைத் தடுக்கும் நோக்கில் நாடு முழுவதும் ஊரடங்கு உத்தரவு நீட்டிக்கப்பட்டுள்ளது. இதனால் அத்தியாவசியப் பொருள்கள் விற்பனை செய்யும் கடைகளைத் தவிர மற்ற அனைத்து கடைகளும் மூடப்பட்டுள்ளன. குறிப்பாக மதுபானக் கடைகள் மூடப்பட்டுள்ளன. இச்சூழ்நிலையை பயன்படுத்தி சிலர் சட்ட விரோதமாக மதுபானத்தை பதுக்கி வைத்து கூடுதல் விலைக்கு விற்றுவருவதாக தமிழ்நாடு மதுவிலக்கு அமலாக்கப் பிரிவு காவல் துறைக்கு தகவல் கிடைத்தது.

இந்தத் தகவலின் பேரில், சட்டவிரோத மது விற்பனை செய்யும் நபர்களை உடனடியாகக் கைது செய்ய வேண்டும் என தமிழ்நாடு டிஜிபி திரிபாதி உத்தரவிட்டிருந்தார். உத்தரவின் பேரில், மதுவிலக்கு அமலாக்கப்பிரிவினர் தீவிரமாக சோதனை நடத்தினர்.

ஊரடங்கில் ஒரே நாளில் 99 நபர்கள் கைது

இதில், நேற்று ஒரே நாளில் மட்டும் வடக்கு மண்டலத்தில் சட்ட விரோதமாக 111 பேர் மதுபானம் விற்பனை செய்தது தெரியவந்தது.

அதில் 33 பேர் கைது செய்யப்பட்டனர். இதேபோல், மத்திய மண்டலத்தில் 16 பேரும், மேற்கு மண்டலத்தில் 6 பேரும், கிழக்கு மண்டலத்தில் 44 பேரும் என மொத்தம் 99 பேரை காவல் துறையினர் கைது செய்தனர். இதில் தொடர்புடையை 112 பேரையும் காவல் துறையினர் தேடி வருகின்றனர்.

மேலும், சென்னையில் அசோக் நகர் காவல் துறையினர், ரோந்துப் பணியிலிருந்தபோது மதுபாட்டில்களை பதுக்கி விற்பனை செய்த இருவரைக் கைது செய்தனர். அவர்களிடமிருந்து 40 மதுபான பாட்டில்கள் பறிமுதல் செய்யப்பட்டன.

இதையும் படிங்க:புலிகளை விஷம் வைத்துக் கொன்ற இருவர் கைது